Շիրակի մարզում վարակման տեմպերի աճ է գրանցվել. մարզպետ
«Մենք համարում ենք, որ այս պահին Շիրակի մարզում ունենք որոշ բժշկական ռեսուրսներ, որոնք կարող ենք օգտագործել հիվանդներին բուժելու համար»,- այս մասին այսօր ասել է Շիրակի մարզպետ Տիգրան Պետրոսյանը՝ ներկայացնելով համավարակի ընթացքում մարզում տիրող իրավիճակը:
Ինչպես տեղեկացրել է` Շիրակի մարզում այս պահին ինքնամեկուսացման ցուցում ունի մոտ 700 անձ , որոնցից 109-ի մոտ հաստատված է կորոնավիրուսային հիվանդությունը:
«Շիրակի մարզում մինչև այսօր ունենք կորոնավիրուսով վարակվելու 490 դեպք, որոնցից 200-ն արդեն բուժվել են, գրանցվել է 10 մահ: Մարզում գործում է Գյումրու ինֆեկցիոն հիվանդանոցը, որտեղ էլ բուժվում են 70-ից ավել կորոնավիրուսով հիվանդները, որոնցից 46-ն է Շիրակի մարզից: Շիրակի մարզն ավելի պասիվ էր, սակայն հունիսի սկզբից վարակման տեմպերի աճ է գրանցվել, որը պայմանավորված է Գյումրու մեծ արտադրական ձեռնարկությունների գործելով, որտեղ էլ կորոնավիրուսային վարակման դեպքեր են գրանցվել»,- ասաց Տիգրան Պետրոսյանը::