Ցածր մասնակցությունը «հաղթողի նզովքն» էր․ քաղաքագետ
«Բարգավաճ Հայաստանի» ավանդական ընտրազանգվածը, որպես կանոն, Երևանում չի գտնվում, այլ գյուղական բնակավայրերում, ինչը և դարձավ գործարար Գագիկ Ծառուկյանի կուսակցության անհաջողության պատճառը.նման կարծիք ունի քաղաքագետ, Կովկաս ինստիտուտի տնօրեն Ալեքսանդր Իսկանդարյանը : «Ընդհանուր առմամբ, այլ արդյունքներ չէի սպասում։ Ես «Իմ քայլը» դաշինքի հնարավորությունները գնահատել էի 75-80 տոկոսի միջև: Այսինքն՝ ոչ այդքան բարձր: Սա կարող է այն բանի արդյունքը լինել, ինչը տեղի ունեցավ վերջին օրերին: Նկատի ունեմ «Բարգավաճ Հայաստանում» խուզարկությունները և այդ խուզարկությունների հետ կապված հայտարարությունները»,- ասաց Իսկանդարյանը: Նրա գնահատմամբ` սա ոչ թե քաղաքապետի ընտրություն էր, այլ վստահության քվե։ «Երևանցիներն այս ընտրություններում նվազագույնը հաստատեցին գործադիր իշխանության չափազանց բարձր վարկանիշը»,- նշեց քաղաքագետը: «Ցածր մասնակցությունը շատ հեշտ է բացատրել, քանի որ դա, այսպես ասած, «հաղթողի նզովքն» է: Այսինքն՝ այս ընտրությունները պարզապես մրցակցային չէին»,- ասաց քաղաքագետը՝ ընտրությունները որակելով քաղաքական ընտրություններ։
Հետևեք մեզ Viber-ում
