Միայն ԱՄՆ-ը կարող է ստիպել Իսրայելին դադարեցնել պատերազմը. Պաղեստինի փոխնախագահ
Միացյալ Նահանգները միակ կողմն է, որը կարող է ստիպել Իսրայելին դադարեցնել պատերազմը Գազայի հատվածում։ Al Arabiya հեռուստաալիքին նման կարծիք է հայտնել Պաղեստինի փոխնախագահ Հուսեյն Շեյխը։
«ԱՄՆ-ը միակ կողմն է, որը կարող է ստիպել Իսրայելին դադարեցնել պատերազմը Գազայի հատվածում»,- ասել է նա՝ հույս հայտնելով, որ արմատական պաղեստինյան ՀԱՄԱՍ շարժումը նույնպես համարձակ քայլեր կձեռնարկի, որոնք կհանգեցնեն պատերազմի ավարտին։ «ՀԱՄԱՍ շարժումը ժողովրդի մի մասն է, այն չի կարող դուրս մնալ քաղաքական կյանքից: «ՀԱՄԱՍ-ը պետք է փոխի իր քաղաքականությունը՝ դառնալու համար մեր քաղաքական համակարգի մաս»,- շարունակել է Շեյխը՝ վստահեցնելով, որ Պաղեստինի ազգային իշխանությունը (ՊԱԻ) երկխոսություն է վարում շարժման հետ:
«Պաղեստին պետության ստեղծման լավագույն միջոցն այժմ խաղաղ դիմադրությունն է Իսրայելին, ոչ թե զինված պայքարը: Մենք բանակցում ենք Իսրայելի հետ՝ մեր իրավունքներին հասնելու եւ մեր սեփական պետությունը ստեղծելու համար: Մեր առաջնահերթությունը պաղեստինցի ժողովրդին իր հողում ամրապնդելն է»,- ընդգծել է փոխնախագահը: «Մենք չենք ընդունի ՊԱԻ-ի կառավարման որեւէ այլընտրանք Գազայի հատվածում»,- ասել է նա։
Հետևեք մեզ Viber-ում
