Գոյություն չունեցող կերպարները, ճապոնացի հերոսուհին, կոճղերով նկարներն ու մանուկները մեկ վայրում

Մարտի 25-ին, Նկարիչների միությունում, տեղի ունեցավ Радуга արվեստի կենտրոնի հաշվետու ցուցահանդեսը՝ «Գույների ուժը» խորագրով: Կենտրոնի սաները ներկայացրեցին իրենց աշխատանքները, որոնք ստեղծվել են մի քանի ամիսների ընթացքում, և նրանց մեջ ներդրվել են մեծ սեր և բազում գույներ:

Радуга արվեստի կենտրոնի տնօրեն Ինեսսա Ստեփանովնան, մեզ հետ զրույցում, նշեց, որ կենտրոնը գործում է արդեն 7 տարի: «Շատ մեծ սիրով եմ աշխատում երեխաների հետ, նրանց ճիշտ ուղղություն տալիս: Երեխաների հետ աշխատելը որքան որ դժվար է, միևնույն ժամանակ էլ հեշտ է ու հաճելի։ Նրանք ամենաանկեղծ են և ամենակարևորը ամենալավ նկարիչները հենց իրենք են, ազատ , անկաշկանդ և լուսավոր էակներ, որոնց հետ աշխատելը ինձ համար առօրյայից կտրվելու, երջանիկ պահեր վայելելու միջոց է: Իրենցից շատ բան կա սովորելու»,-հավելեց նա՝ տեղեկացնելով, որ այսօրվա ցուցահանդեսն արդեն թվով տասներորդն է:

Ցուցահանդեսը կոչվում է «Գույների ուժը», քանի որ տարբերվում է նախորդներից իր գույներով և անսահման սիրով։«Միշտ ուղորդում ենք, միտք ենք տալիս, զրուցում ենք, քնարկում ենք և թույլ ենք տալիս իրենց ինքնուրյուն թղթին փոխանցել այն, ինչ իրենք ցանկանում են իրականում։ Կարծում եմ որակով աշխատանք ստանալու համար ամենակարևորն է ինքնուրույն գործելը և սա վերաբերում է ոչ միայն նկարչությանը, այլ ամբողջ կյանքում յուրաքանչյուր ոլորտին»,- եզրափակեց նա: