Ողբերգական քննություն իշխանության համար. Հրազդանի քաղաքապետը հրաժարական կտա՞

Հունիսի 8-ին վրաերթ է տեղի ունեցել Կոտայքի մարզում։ Ժամը 12։30-ի սահմաններոմ Nissan Teana մակնիշի 444 ԼԼ 70 համարանիշի ավտոմեքենայի վարորդը Հրազդան քաղաքում՝ Շահումյան փողոցում, վրաերթի է ենթարկել հետիոտնին։ Ինչպես դեպքի վայրից հայտնում է ֆոտոլրագրող Գագիկ Շամշյանը, վարորդը ավտոմեքենայի համարանիշերը մեքենայի վրայից հանել է և դեպքի վայրից դիմել փախուստի, իսկ վրաերթի ենթարկվածը՝ Հրազդան քաղաքի Միկրոշրջան թաղամասի 223 շենքի 12 բնակարանի բնակիչ 58-ամյա Վալերի Թորոսյանը, ծայրահեղ ծանր վիճակում տեղափոխվել է Հրազդանի բժշկական կենտրոն, որտեղ գիտակցության չգալով՝ մահացել է։ Դեպքի վայրում հավաքվածներն ասում էին, որ ավտոմեքենան հաշվառված է Հրազդանի քաղաքապետարանի հաշվեկշռում և սպասարկում է Հրազդանի քաղաքապետ Արամ Դանիելյանին, իսկ ավտոմեքենան վարել է նրա որդին՝ Հրազդան քաղաքի Միկրոշրջան թաղամասի 8-րդ շենքի 11 բնակարանի բնակիչ՝ 17-ամյա Ռազմիկ Արամի Դանիելյանը։ Գ. Շամշյանի տեղեկություններով՝ քաղաքապետի «փափկասուն բալիկը» ավտոմեքենան վարելու իրավունք չունի, քանի որ վարորդական իրավունքի վկայական չունի, ու հիմա նրա հայրը՝ Հրազդանի քաղաքապետ «մեծն» Ա. Դանիելյանը, փորձում է մեկ ուրիշին ներկայացնել որպես վարորդ, որպեսզի իր բալիկը պատասխանատվության չենթարկվի։ Դեպքի վայր է ժամանել ոստիկանության Հրազդանի բաժնի օպերատիվ խումբը՝ Հրազդանի ոստիկանապետ Կարեն Գրիգորյանի գլխավորությամբ։  Դեպքի մասին ՃՈ օպերատիվ կառավարման կենտրոնի պատասխանատու հերթապահ Արշակ Գրիգորյանը տեղեկությունը փոխանցել է Հայաստանի քննչական կոմիտեի Կոտայքի մարզային քննչական վարչություն, որտեղից ժամանել է քննչական խումբը՝ վարչության պետ, Արդարադատության գնդապետ Մհեր Վարդանյանի գլխավորությամբ։ Hayeli.ամ-ի տեղեկություններով՝  նշված մեքենան իրականում եղել է Հրազդանի քաղաքապետ Արամ Դանիելյանի  ծառայողական մեքենան, և միայն այն փաստը, որ նրա ղեկին նստած է եղել քաղաքապետի անչափահաս որդին, արդեն իսկ օրենքի խախտում է:  Հրազդանում նաև պատմում են, որ քաղաքապետի որդին առաջին անգամը չէ, որ նստում է հոր ծառայողական մեքենայի ղեկին: Նրան նախկինում ևս տեսնողներ են եղել այս մեքենան վարելիս: Այժմ Արամ Դանիելյանն ամեն ինչ անում է՝ որդուն փրկելու համար: Քաղաքում տարածված խոսակցությունների համաձայն՝ վրաերթի մեղքը պատրատստվում է իր վրա վերցնել Արամ Դանիելյանի վարորդը: Մեզ նաև հայտնի է դարձել, որ վրաերթի հետևանքով մահացած Վալերի Թորոսյանը «Գազպրոմ Արմենիա» ընկերության Հրազդանի ԳԳՄ-ի աշխատակից է: Ավելի ուշ հաղորդագրություն տարածեց Քննչական կոմիտեն, որտեղ մասնավորապես նշված է. «ՀՀ ՔԿ Կոտայքի մարզային քննչական վարչությունում հարուցվել է քրեական գործ՝ Հրազդան քաղաքի բնակիչ, 1959 թ. ծնված Վալերի Թորոսյանին վրաերթի ենթարկելու դեպքի առթիվ։ Նախնական տվյալներով՝ 2017թ. հունիսի 8-ին՝ ժամը 12.25-ի սահմաններում, Հրազդանի քաղաքապետարանին պատկանող «Նիսսան Տիանա» մակնիշի, 444 LL 70 համարանիշի ավտոմեքենան, Հրազդան քաղաքի Շահումյան փողոցում, Քաղսի գյուղից դեպի Հրազդան ընթանալիս, նախկին կաթի գործարանի մոտ, վրաերթի է ենթարկել ճանապարհը հատող հետիոտն, նույն քաղաքի բնակիչ, 1959թ. ծնված Վալերի Թորոսյանին։ Վերջինս մարմնական վնասվածքներով տեղափոխվել է «Հրազդան ԲԿ» ՓԲԸ, որտեղ էլ գիտակցության չգալով մահացել է: Կոտայքի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 242-րդ հոդվածի 2-րդ մասով (ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ)։ Իրականացվում են անհրաժեշտ քննչական գործողություններ՝ դեպքի բոլոր հանգամանքները պարզելու ուղղությամբ։ Հաշվի առնելով հանրության հետաքրքրությունը` տեղեկացնում ենք, որ դեպքի վայրում վարույթն իրականացնող մարմնին է ներկայացել Հրազդան քաղաքի բնակիչ, 1985թ. ծնված մի տղամարդ և հայտարարել, թե վրաերթ կատարելու պահին նշված ավտոմեքենայի ղեկին գտնվել է ինքը, սակայն քրեական գործի նախաքննությամբ փաստական տվյալներ են ձեռք բերվել, որ ղեկին գտնվել է 16-17 տարեկան պատանի։ Ներկայումս կատարվում են անհրաժեշտ քննչական եւ դատավարական այլ գործողություններ՝ նախաքննությամբ ստացված տվյալներն ստուգելու, ճանաչման ներկայացնելու ուղղությամբ։ Նշենք, որ մամուլում շրջանառվող տեղեկությունների համաձայն, վրաերթը կատարել եւ դեպքի վայրից փախուստի է դիմել Հրազդան քաղաքի Միկրոշրջան թաղամասի 8-րդ շենքի 11 բնակարանի բնակիչ՝ 17-ամյա Ռազմիկ Արամի Դանիելյանը՝ Հրազդանի քաղաքապետ Արամ Դանիելյանի որդին»։ Հետաքրքիր է՝ որդու ողբերգական արկածը արդյոք առիթ կդառնա՞, որպեսզի Հրազդանի քաղաքապետը հրաժարական տա զբաղեցրած պաշտոնից: Եվրոպական մի քանի երկրներում, երբ հանրությանը հաջողվել է բացահայտել, որ այս կամ այն բարձրաստիճան պաշտոնյան ծառայողական մեքնենան  սեփական կարիքների համար է օգտագործում, ապա վերածվել է քաղաքական լուրջ սկանդալի և ավարտվել պաշտոնանկությամբ: Այս դեպքում մենք գործ ունենք ողբերգության հետ: Ճիշտ ժամանակն է հետևել և տեսնել, թե ինչպես են իրենց դրսևորելու արդարադատության և օրենքի հավասարության մասին խոսող հայրենի իրավապահները, դատավորներն ու իշխանությունները: Մի քանի տարի առաջ տեղի ունեցած ողբերգական վթարի համար դերասան Վարդան Պետրոսյանը շատ թանկ գին վճարեց՝ նա ստիպված եղավ անգամ տևական ժամանակ բանտ նստել: Կատարված դեպքը լուրջ մարտահրավեր է նաև իշխանության համար, ով այս օրերին քննարկում է կոռուպցիայի դեմ պայքարի նոր մարմին ստեղծելու և արդար համակարգ ներդնելու մասին: Սա առաջին ողբերգական հետևանքով լուրջ քննությունն է՝ հասկանալու համար, թե իշխանությունն իսկապես պատրաստ է ուղղվել, պատրաստ է օրենքը կիրառել բոլոր՝ այդ թվում նաև յուրայինների համար, թե այդ ամենը հերթակամն ձևականությունն է: Հայկ Դավթյան