Սուրճ, թեյ, թխվածքաբլիթներ, ընդեղեն, բենզին․ ինչի վրա է վարչապետի աշխատակազմը ծախսել տասնյակ միլիոններ

ՀՀ վարչապետի աշխատակազմը մի քանի տասնյակ միլիոններ է ծախսել տարբեր ծառայությունների, գրասենյակային պարագաների և ներկայացուցչական կարիքների համար։ «Փաստինֆո»-ն պաշտոնական բաց աղբյուրներից տեղեկացել է, որ կնքված պայմանագրերի և համաձայնագրերի ընդհանուր արժեքը կազմել է 29 միլիոն 763 հազար 306 դրամ։

Գնումներն իրականացվել են «Վենդա», «Հայր և որդի Երեմյաններ», «Անդակո», «Մաքս Օիլ», «Փի-Լենդ», «Առկտուր», «ՄՄՄ Տեխ», «Գալերի Ռոյալ», «Ֆոտո Մանս», «Արդեան» ընկերությունների, ինչպես նաև ՀՀ կենտրոնական բանկի և անհատ ձեռնարկատեր Աղվան Մուշեղյանի հետ։

Ձեռքբերումների ցանկը բավական բազմազան է։ Վարչապետի աշխատակազմը գնել է տարբեր տեսակի սուրճ, թեյ, թխվածքաբլիթներ, շոկոլադե կոնֆետներ, ընդեղեն, պատվիրել հանրային սննդի կազմակերպման ծառայություններ, ինչպես նաև ձեռք բերել պողպատե շրջանակով նկարներ, ֆոտոծառայություններ և արվեստի գործեր։

Գնումների շարքում տեղ են գտել նաև ավտոմեքենաների համար նախատեսված էլեկտրական լամպեր, հակասառեցուցիչ հեղուկներ և ռեգուլյար տեսակի բենզին։
Բացի այդ, պետական միջոցներով ձեռք են բերվել Canon բազմաֆունկցիոնալ գունավոր ցանցային տպիչներ, ղեկավարի բազկաթոռ, գրասենյակային աթոռներ, օդորակիչներ և կենցաղային սառնարաններ։