Վերջերս 4 գերիների վերադարձի հարցում ՀՀ իշխանությունների դերակատարությունը չկար, նրանք նույնիսկ տեղյակ չէին. Արցախի ԱԺ պատգամավոր

Մենք որևէ ակնկալիք չունեինք ԱՄՆ փոխնախագահ Ջեյ Դի Վենսի այցից։ Հաշվի առնելով 2020թ.-ին տեղի ունեցածը, արցախցիները մեծ հույսեր որևէ միջազգային դերակատարի հետ չեն կապում, նույնիսկ եթե դա ԱՄՆ փոխնախագահն է։ Այս մասին «Փաստինֆո»-ի հետ զրույցում ասաց Արցախի ԱԺ պատգամավոր Մետաքսե Հակոբյանը՝ անդրադառնալով Ջեյ Դի Վենսի այցի կապակցությամբ Երևանում անցկացված բողոքի ակցիաներին ու նրան հղված նամակներին։

«Բայց դա չի նշանակում, որ մենք պետք է կանգ առնենք և չփորձենք իշխանական քարոզչամեքենայից բարձր հնչեցնել մեր ձայնը, որովհետև նրանք ամեն կերպ խլացնում են ի պաշտպանություն մեր պատանդառված հայրենակիցների արված մեր կոչերը։ Մեզ մոտ կա այն գիտակցումը, որ այն հարցը, որը զուտ հումանիտար դաշտում լուծվող խնդիր էր, այս իշխանությունների ձեռամբ մտավ քաղաքական դաշտ և դարձավ առևտրի թեմա, ինչն անթույլատրելի է։ Հաշվի առնելով այն հանգամանքը, որ ԱՄՆ-ն Հայաստան-Ադրբեջան հարաբերություններում արդեն իսկ ունի դերակատարություն, իրենք ոչ թե միջնորդ կամ դիտորդ են, այլև հստակ պատասխանատվություն են կրում այս հարցում և պարտավորություն ունեն կոնկրետ քայլեր անել ու միջամտել»,- ընդգծեց Մ. Հակոբյանը։

Պատգամավորի խոսքով՝ ԱՄՆ-ն հնարավորություն ունի ապացուցելու, որ իրոք շահագրգռված է ավարտին հասցնելու խաղաղության գործընթացը։

«Այսօր արդեն պիտի հստակ հնչեր, որ գերիները ու պատանդառված մեր հայրենակիցները ազատ կարձակվեն։ Հակառակ դեպքում՝ սա էլի երկակի խաղ է, որտեղ ակնհայտ է դառնում, որ Ադրբեջանը և Միացյալ Նահանգներն ունեն իրենց շահը, իսկ Հայաստանը, ի դեմս այս իշխանությունների, գործիք է, որով ապահովվում են այս երկու երկրների շահերի իրականացումը»,- ասաց Մ. Հակոբյանը։

Արցախի ԱԺ պատգամավորը վստահություն հայտնեց, որ վերջերս 4 գերիների վերադարձի հարցում ՀՀ իշխանությունների դերակատարությունը չկար, նրանք նույնիսկ տեղյակ չէին, ինչպես տեղյակ չէին Արցախից ՀՀ եկած 11 հայերի մասին։

«Չի կարելի բացառել, որ ընտրությունների նախաշեմին մեր գերիներից որոշներին բաց թողեն, զուտ այն պատճառով, որ արդեն Թուրքիան ու Ադրբեջանը չեն թաքցնում, որ իրենք կողմ են և օգնելու են ՀՀ ներկայիս իշխանություններին վերարատադրվել»,- շեշտեց Մ. Հակոբյանը։

Պատգամավորն ընդգծեց, որ Բաքվից բոլոր գերիների վերադարձը կարող է տեղի ունենալ միայն քաղաքական օրակարգ փոխվելու պարագայում։ «Իսկ քաղաքական օրակարգ կփոխվի միայն այն դեպքում, երբ ազգային ուժեր իշխանության գան»,- ասաց նա։