Ի՞նչ է քննարկվել Արցախի նախագահի հետ փակ նիստին.մանրամասներ (video)

Չի կարող միջնորդավորված ընտրված նախագահը լուծարել հանրաքվեով անկախացած պետությունը, այդ հրամանագիրը իրավական ուժ չունի: Այս մասին այսօր՝ նոյեմբերի 1-ին, «Արմենիա Մարիոթ» հյուրանոցում փակ քննարկումից հետո լրագրողների հետ զրույցում նշեց փաստաբան Արա Զոհրաբյանը:

Արա Զոհրաբյանը հայտնեց, որ փակ քննարկմանը տարբեր հարցեր են քննարկվել, նաև ՀՀ իշխանության-Արցախի իշխանություն համագործակցությունը։ Հարցին՝ ՀՀ իշխանությունը պատրա՞ստ է ողջունել, համագործակցել Արցախի իշխանության, մասնավորապես, Սամվել Շահրամանյանի հետ, Արա Զոհրաբյանն ասաց. «Իմ անձնական կարծիքը. կարող եմ ասել, բնականաբար, Հայաստանի իշխանությունը հրաժարվել է Արցախին սատար կանգնելուց, որի և բարոյական, և իրավական պարտականությունն էր։ Այս վիճակը, որ ունենք, ունենք նաև Հայաստանի իշխանությունների գործուն մասնակցությամբ։ Այս իշխանությունները, ցավոք, հակահայկական կեցվածք ունեն։ Բնականաբար, եթե այս իշխանությունները սրտացավ վերաբերմունք ունենային, մենք այլ վիճակ կունենայինք։

Մենք պետք է մեր հնարավոր միջոցերը, ճնշումները կիրառենք, որպեսզի Արցախի իրավունքների, ինքնորոշման հարցը լուծվի։ Այս իշխանությունը խանգարող հանգամանք է, բայց դա չի նշանակում, որ մենք չպետք է քննարկենք»։