8-ը 1-ի դեմ
«Ազգային անվտանգություն» կուսակցության նախագահ Գառնիկ Իսագուլյանն այսօր լրագրողների հետ զրույցում նժեց, որ հակառակ իր կարծիքի, Հայաստանում անցկացված Սահմանադրական փոփոխությունները շատ դրական ազդեցություն ունեցան: Ըստ նրա այսպիսով պարզ դարձավ, որ Հայաստանում չկան կայացած կուսակցություններ:
«Բոլորը հայտարարում էին, թե ինչքան անդամներ ունեն, ինչքան կառույցներ ունեն մարզերում, շրջաններում, ամեն ինչ անում էին, որ համամասնական ընտրակարգով գնան ընտրությունները: Բայց նոր համակարգը ցույց տվեց, թե ով ինչքան ռեսուրս ունի, ցույց տվեց, որ կուսակցություններում կա ղեկավար մարմին, որի տակ կուսակցական կառույց գոյություն չունի, չունեն ռեյտինգային թեկնածուներ, կուսակցական կազմակերպություններ: Մենք տեսանք, թե ով ինչ պաշարներ ունի»,- ասաց Իսագուլյանը:
Նրա համոզմամբ՝ միայն ՀՀԿ-ն է, որ պատվով դուրս եկավ:
«Այս առումով բացառություն է «Հանրապետական» կուսակցությունը, բարվոք է նաև ՀՅԴ վիճակը, իսկ մյուս կուսակցությունները ընտրություններից առաջ սկսեցին ձևավորել իրենց գրասենյակները, աշխատանքները: Ստացվում է, որ 8-ը 1-ի դեմ է պայքարում: Բոլորի հիմնական թիրախը ՀՀԿ-ն էր, բոլորը քննադատում էին ՀՀԿ-ին: Ինձ համար զարմանալի ու գովելի էր, որ ՀՀԿ-ն, սակայն, որևէ կուսակցության թիրախ չդարձրեց: ՀՀԿ-ն որևէ անգամ չանդրադարձավ այս հարձակումներին ու ստացվեց խաղ՝ 8-ը 1-ի դեմ»,- եզրափակեց բանախոսը:
Անի Աղազարյան
Հետևեք մեզ Viber-ում
