Պարտավոր ենք դուրս գալ կենաց-մահու պայքարի, ետդարձի ճանապարհ չկա. Արաբոյի Մանվել

Այսօր Ազատության հրապարակում «Օհանյան–Րաֆֆի–Օսկանյան» դաշինքի հրավիրած հանրահավաքին ելույթով հանդես եկավ «Արաբո» ջոկատի հրամանատար, «Օհանյան–Րաֆֆի–Օսկանյան» դաշինքի անդամ Մանվել Եղիազարյանը։ «Մենք ուզում էինք հայրենիք կառուցել, ժպիտ տեսնել ձեր դեմքին, սարքել Հայոց տունն այնպիսի բարձր պարսպով, որ ոչ մի թշնամի չմտներ։ Մենք պայքարում էինք, որ աշխարհում ամեն մի հայ գիտակցեր՝ եթե վտանգված է իր ընտանիքը, երեխան պատսպարվելու է պարիսպում, իսկ ինքը մինչև վերջ կտանի պայքարը։ Այսօր մենք ի՞նչ ունենք՝ դժբախտ, ցնցոտիների մեջ հայրենիք, ես ամաչում եմ, որ դա իմ հայրենիքն է, թող նա ինձ ների: Մենք հանդուրժել ենք, որ ամեն փոքրոգի մարդ թաքնվել է պատերազմի ժամանակ, չի պայքարել հայրենիքի համար, որ մեզ թալանի, որ հայ աղջիկը տղամարդ չգտնի ամուսնանալու: Դա ենք արել ընդամենը»,- հայտարարեց նա: Ինչպես հայտարարեց՝ այսօր հայ մարդը պարտավոր է դուրս գալու կենաց ու մահվան կռվի, և ետդարձի ճանապարհ չկա: Անի Աղազարյան