Վիեննայի և Սանկտ Պետերբուրգի պայմանավորվածություններն իրենց արդիականությունը չեն կորցրել. Հոգլանդ

«Ես չեմ պատրաստվում մանրամասներ ներկայացնել այն մասին, թե մյուս կողմն ինչ է մտածում, լավագույն տարբերակն այդ հարցը նրանց ուղղելն է՝ իմանալու համար, թե նրանք ինչ են կարծում։ Մեր աշխատանքը ոչ թե այն է, որ մենք չեզոք լինենք, այլ  այն է, որ մենք լինենք զգուշավոր, որպեսզի չստեղծենք այնպիսի իրավիճակ, այնպիսի  պայման, որի հետևանքով կողմերից մեկը կարող է մեզ ասել, որ  չի վստահում մեզ, մեր օգնությամբ չի պատրաստվում նստել  բանակցային սեղանի շուրջ, ուստի շատ նուրբ դիվանագիտական աշխատանք է պահանջվում։ Կուզեի հստակ  պատասխան տալ, բայց որպես դիվանագետ՝ հասկանում եմ՝ պետք է զգուշավոր լինեմ այն խոսքում, որը հրապարակավ կհնչեցնեմ»,- ասաց Հոգլանդը։Խոսելով Բաքվում  համանախագահների և Բաքվի իշխանությունների քննարկած թեմաներից՝ Հոգլանդը կրկին նշեց, որ դիվանագիտական էթիկան թույլ չի տալիս բացել խաղաքարտերը։ «Մենք խոսել ենք համաձայնությունների  մասին, որոնք ձեռք էին բերվել Վիեննայում և Սանկտ Պետերբուրգում, մենք լիովին հավատացած ենք, որ վստահության  ամրապնդմանն ուղղված այդ միջոցները   դեռևս իրենց արժեքը պահպանում են, և  ցանկանում ենք, որպեսզի դրանք իրականացվեն։ Ուստի պետք է փորձենք ապահովել այն պայմանները, որպեսզի առաջնորդները կրկին միմյանց հետ նստեն և խոսեն այս հարցերի մասին, որովհետև սա է միակ ողջամիտ ճանապարհը»,- ընդգծեց ամերիկացի համանախագահը։ Ըստ Հոգլանդի՝ ազգային կամ քաղաքական պատճառներով այս կամ այն առաջնորդը կարող է խոսել բռնության, պատերազմի մասին, մյուս կողմն էլ կարող է ասել՝ մենք էլ ենք պայքարելու, անպատասխան չենք թողնելու: «Բայց թույլ տվեք այստեղ ասեմ հետևյալը՝ դրանք պետք է միայն լինեն բառեր և չպետք է երբեք դառնան գործողություն»,-ասաց նա։