«Այն, ինչը մենք տեսել ենք նկարների մեջ, խողովակատիպ գործիք է, որը չի կարող կրակել». Սեյրան Օհանյանը՝ Իգլայի մասին

«Օհանյան-Րաֆֆի-Օսկանայան» դաշինքը գլխավորող Պաշտպանության նախկին նախարար Սեյրան Օհանյանն այսօր կայացած ասուլիսի ժամանակ նշեց, որ իրենց դաշինքի նկատմամբ եղել են ճնշումներ՝ սկսած Ջրառատի, Էջմիածնի դեպքերից մինչև Սամվել Բաբայանի ձերբակալությունը: «Կարծում եմ, որ որևիցե մի առնչություն ինքը չունի և չեմ կարծում, որ կարող էր այդպիսի փոքր խնդիրներով զբաղվել: Եթե կան այդպսի տեղեկություններ, թող տան, որ մենք էլ իմանանք, եթե չկան, ապա գոնե այս ժամանակահատվածի համար մենք գտնում ենք, որ դրանք քաղաքական հետապնդումներ են և´ Սամվել Բաբայանի նկատմամբ, և´ մեր դաշինքի»,- ասաց նա: Ինչպես ասաց՝ Բաբայանը որպես համակիր է իրենց հետ եղել եւ աջակցել: Դատախազությունը տեղեկատվություն տարածեց, որ Սամվել Բաբայանն ընդունել է իր առնչությունը «Իգլայի» ներկրմանը, հետագայում փաստաբանն ասաց, որ դատախազությունը յուրովի է մեկնաբանել այն: «Սամվել Բաբայանը մեր մարտական ընկերն է, մեր գաղափարակիցը, մեր գործընկերը, տարբեր ժամանակահատվածներում իր հնարավորության սահմաններում աջակցել է մեզ և նրա իրավուքներների պաշտպանության գործում մենք պետք է հաստատակամ լինենք և մինչև վերջ գնանք: Նա չէր կարող այս կարճ ժամանակահատվածում այնպիսի տեղեկություն տարածեր, որը Սամվելի ասածներից հեռու էր: Մենք փաստաբանին ենք հավատում: Այն, ինչը մենք տեսել ենք նկարների մեջ, խողովակատիպ գործիք է, որը չի կարող կրակել: Եթե մենք ուզում ենք քաղաքական ուժին հարված հասցնել, որն ուժ ունի, վերահսկողության տակ չի, իր հարաճուն գործընթացներն է իրականացնում, կարող ենք ասել, որ դա քաղաքական նպատակներով է: Եթե ունեն այլ տեղեկություններ, թող դա տարածեն»: Անի Աղազարյան