«Россия -24» -ի հատուկ ռեպորտաժը Հայաստանի մասին

Հազարամյակների պատմություն ունեցող Հայաստանի  ավանդույթներն ու ձեռքբերումները, հոգևոր ու նյութական ժառանգությունը, յուրօրինակ բնությունը, մայրաքաղաք Երևանի և զբոսաշրջային կենտրոնների կոլորիտը.15 րոպե հատուկ ռեպորտաժը «Россия -24»-ի եթերում պատմում է  Հայաստանի ողջ հմայքի մասին: Ռեպորտաժի հեղինակ Անտոն Բորիսովը Մոսկվայի օդանավակայանից Երևան է ուղևորվել ՌԴ  քաղաքացիների համար նախատեսված ներքին անձնագրով:Հնագույն եկեղեցիներ, որոնցից 8-ը ՅՈՒՆԵՍԿՕ-ի ոչ մշակութային ժառանգության ցանկում են, գորգագործություն, որը Հայաստանում սկիզբ է առել դեռ մեր թվարկությունից առաջ, 6 000 տարվա հնության գինեգործական համալիր, որը գտնվել է Արենիի քարանձավում և վկայում է, որ Հայաստանը գինեգործության բնօրանն է եղել, այս ամենի կողքին՝ միջազգային կրթական կենտրոններ, որտեղ ինովացիոն կրթություն են ստանում երեխաներ՝ աշխարհի տարբեր ծայրերից, զարգացող տեղեկատվական տեխնոլոգիաներ, ժամանակակից հյուրանոցներ, ռեստորաններ, զբոսաշրջային կենտրոններ ,պատմում է հեղինակը: Լավաշի և արևահամ ծիրանի հայրենիքում ռուս լրագրողը բազմաթիվ այլ բացահայտումներ է արել: Հռոմից ավելի հին Երևանը թղթակցին ներկայացել է վերակառուցված Կասկադով ու այնտեղ գտնվող ժամանակակից արվեստի թանգարանով, Հայաստան տեղափոխված սիրիահայերի համեղ ուտեստները մատուցող ռեստորաններով: Լրագրողը պատմել է, որ կրթական համակարգը բարեփոխելուն ու զարգացնելուն զուգընթաց, Հայաստանում ձեռնարկվում են քայլեր՝ միտված արտադրության ու առևտրաշրջանառության ծավալի աճին, ներդրումների համար բարենպաստ միջավայր ձևավորելուն: Այս ամենի մասին ռեպորտաժում խոսել է նաև ՀՀ վարչապետ Կարեն Կարապետյանը և կարծիք հայտնել, որ խորհրդարանական ընտրություններից հետո Հայաստանում առևտրատնտեսական նոր ակտիվություն կլինի: Անտոն Բորիսովը ներկայացրել  է նաև Հայաստանի տնտեսությունը ,որը այն երկիրն է, որտեղ պահպանվում են ավանդույթները և ստեղծվում են նորերը: