Որեւէ քաղաքական ենթատեքստ չկա. Գառնիկ Իսագուլյանը Սամվել Բաբայանի ձերբակալության մասին
Ազգային անվտանգություն կուսակցության նախագահ, ԼՂՀ նախագահի խորհրդական Գառնիկ Իսագուլյանն այսօր լրագրողների հետ հանդիպմանը ասաց, որ Սամվել Բաբայանի ձերբակալության հետ կապված, այն, ինչ ասել է ԱԱԾ-ն, համապատասխանում է իրականությանը և հայտարարեց, որ հիմք չունենք Ազգային անվտանգության ծառայությանը չվստահելու համար:«Տվյալ տեսակի զենիթա-հրթիռային համակարգը՝ Իգլան, հիմնականում նախատեսված է 3-5 կմ բարձրությամբ թռչող օբյեկտների ոչնչացման համար՝ ինքնաթիռ, անօդաչու թռչող սարք... Թե ինչպես է նախատեսված եղել այն օգտագործել, այդ մասին խոսք չկա»,-նշեց նա: Նա հորդորեց կուսակցություններին ձեռնպահ մնան տարբեր որակումներ տալուց: «Քննությունը ցույց կտա, թե ինչ նպատակ են հետապնդել, արդյո՞ք դա նախատեսված է եղել որոշակի գործողությունների համար։ Բայց եկեք չքաղաքականացնենք ու ասենք, որ ինչ-որ դաշինքի վարկանիշը աճում էր, ուրեմն իշխանությունները պետք է գնային այդ քայլերին»,-շեշտեց նա։ Գառնիկ Իսագուլյանն ասաց, որ ինֆորմացիան իմանալուց հետո առաջինը Անդրանիկ Թեւանյանին է զանգել, որ ճշտի՝ համապատասխանո՞ւմ է իրականությանը այդ լուրը, որ Բաբայանին ձերբակալել են: Որոշ ճշտումներ անելուց հետո Գառնիկ Իսագուլյանը համոզվել է՝ որեւէ քաղաքական ենթատեքստ չկա:
Հետևեք մեզ Viber-ում
