Բանավեճ վարչապետի ու նախարարի միջեւ. «Բա ինչո՞ւ չգիտեք, պարոն Մինասյան»
Կառավարության այսօրվա նիստում բանավեճ տեղի ունեցավ վարչապետ Կարեն Կարապետյանի և էկոնոմիկայի նախարարի պաշտոնակատար Արծվիկ Մինասյանի միջև: Երբ Արծվիկ Մինասյանը ներկայացնում էր ներդրումային ծրագրի շրջանակներում «Շանթ» ՍՊԸ կողմից ապրանքների ներմուծման դեպքում մաքսային և հարկային մարմինների կողմից հաշվարկված ԱԱՀ գումարների վճարման ժամկետը երեք տարի ժամկետով հետաձգելու մասին հարցը, վարչապետ Կարեն Կարապետյանը մի շարք դիտողություններ արեց: Նորանշանակ վարչապետը հետաքրքրվեց՝ մոնիտորինգ իրականացվո՞ւմ է՝ պարզելու համար, թե տարբեր ժամանակատհատվածներում կառավարության արտոնություններից օգտվող ընկերություններն ինչ աշխատատեղեր են բացել: Արծվիկ Մինասյանը պատասխանեց, որ նման համակարգ գոյություն չունի՝ դա պարզելու համար և պարզաբանեց, որ այն երկու պատճառով է՝ նախ, ընկերությունում այցելությունը դիտվում է որպես միջամտություն նրանց աշխատանքին, դրա համար իրենք հարցումների միջոցով են փորձում տեղեկություն ստանալ: «Պարոն Մինասյան, ես չեմ ասում՝ դուք գնաք, բիզնեսից տեղեկանք ուզեք: Ես ուզում եմ հատուկ նշել՝ ՊԵԿ-ին ես նոր հանձնարարություն չեմ տվել, ես ՊԵԿ-ին ասել եմ՝ ինքը իր գործառույթը կատարի ընդամենը: Այդ իսկ պատճառով կարող է իմ հանձնարարականը և դիմումը հնչի մի քիչ աբսուրդ, որովհետև ես ասում եմ այն, ինչ պետք է կատարի ՊԵԿ-ը: Այս պահին դուք լինելով էկոնոմիկայի նախարար, տալով արտոնություններ բիզնեսին, ստեղծելով բարենպաստ պայմաններ, որպեսզի բիզնեսը զարգանա, ստեղծի աշխատատեղ՝ հետաձգում եք գումարներ: Հետո էդ հարցը որևէ ձև մոնիտորինգ չի՞ արվում: Ես չեմ ասում՝ գնանք բիզնեսից տեղեկանք ուզենք, ՊԵԿ-ի հետ պայմանավորվեք, հաշվետվության ձև արեք»- ասաց Կարեն Կարապետյանը: Վարչապետը ՀՅԴ-ական նախարարից հետաքրքվեց, թե որքան ժամանակ են ծախսել ընկերությունները մինչեւ տվյալ արտոնությունը ստանալը: Արծվիկ Մինասյանը պատասխանեց, որ մոտ մեկ շաբաթ: Դրանից հետո Արծվիկ Մինասյանն ասաց, որ լրացուցիչ կներկայացնի այդ տեղեկությունը: «Չգիտե՞ք»,- հարցրեց Կարեն Կարապետյանը: Արծվիկ Մինասյանն ասաց, որ այս պահին չգիտի: «Բա ինչո՞ւ չգիտեք, պարոն Մինասյան: Բիզնեսին աջակցող նախարարություն եք, դուք պետք է իրենց ձեռքը բռնած բոլոր կառույցներով գնաք, որ իրանք իրանց ապահով զգան, որ որևէ մեկն իրենց չխոչընդոտի: 1.5 մլն դրամ արտոնություն է խնդրում, երևի մի յոթ ամիս նամակագրություն է գրել, մենք պետք է էդ ամեն ինչը դասակարգենք, որ բյուրոկրատիան վերացնենք: Կա խաղի կանոն, հայտարարում ենք՝ ով այս խաղի կանոնի տակ է, համապատասխան նախարարությունն արտոնությունը տալիս է, բերում է էստեղ: Պետք է լինի ձևակերպված խաղի կանոն, թե որի դեպքում ենք մենք տալիս արտոնություն: Մնացած առանձին դեպքերը հատուկ կնայենք»,- ասաց Կարեն Կարեպետյանը: Նա նաև հանձնարարեց հստակ տեղեկություն տալ իրեն, թե նախկինում բիզնեսին տրված արտոնություններն ինչ արդյունք են տվել, որքան հետաձգված գումար է վերադարձվել բյուջե, քանի աշխատատեղ է բացվել և այլն: Ռուբինա Սաֆարյան
Հետևեք մեզ Viber-ում
