Հաջորդ փուլը լինելու է ԱԺ-ի և Բաղրամյան 26-ի գրավումը․ Փոստանջյան

Ազգային Ժողովի 5-րդ գումարման 10-րդ նստաշրջանի մեկնարկին ելույթ ունեցավ նաև Ժառանգություն խմբակցության պատգամավոր Զարուհի Փոստանջյանը։ Փոստանջյանը պահանջեց, որ «Հայրենիքի 800 հա բռնազավթման, հուլիսյան դեպքերի ընթացքում քաղաքացիների նկատմամբ ոստիկանության վայրագությունների և քաղաքական հայացքների համար բանտախցերում պահվող քաղաքացիների» հարցերի շուրջ ԱԺ-ն հատուկ նիստ հրավիրի։ Այնուհետև՝ Փոստանջյանը մտքերի փոխանակման ժամին նշեց, թե հարցերը լրջագույն են, և եթե ՀՀ ԱԺ-ն չի անդրադառնում, նշանակում է՝ չի գործում: «Ակնկալիքներ չունեի էլ, բայց խորհրդարանը պետք է լուծարվի, լուծարվի Բաղրամյան 26-ը, այս բոլոր մարդկանց մեղադրյալի աթոռին է պետք նստեցնել: Եթե դուք չեք կարողանում լուծում տալ, դա չի նշանակում, որ մենք չենք կարող լուծում տալ։ Հաջորդ փուլը լինելու է ոչ թե ՊՊԾ-ների, այլ ԱԺ-ի և Բաղրամյան 26-ի գրավումը»,-ասաց Փոստանջյանը։