Գողացել են 10 հազար ԱՄՆ դոլար, 4 մլն դրամ և ոսկյա զարդեր

Սեպտեմբերի 7-ին խոշոր չափի գողության դեպք է տեղի ունեցել Սյունիքի մարզում։ ՀՀ ներքին գործերի նախարարության ոստիկանության քրեական ոստիկանության գլխավոր վարչության Սյունիքի մարզային վարչություն է ահազանգել Սյունիքի մարզի բնակիչ 33-ամյա Շանթ Ա․-ն և հայտնել, որ իր բնակարանից գողություն է կատարվել։

Ինչպես հայտնում է ֆոտոլրագրող Գագիկ Շամշյանը, Շանթ Ա․-ն քրեական ոստիկաններին հայտնել է, որ սեպտեմբերի 7-ին՝ ժամը 10։00-ից մինչև 16։30-ն ընկած ժամանակահատվածում, մուտքի դռան փականը բանալիով բացելու եղանակով ապօրինի մուտք են գործել իր բնակարան, խառնել տան իրերը, մի ննջասենյակի պահարաններից գողացել 4 մլն դրամ և 10 հազար ԱՄՆ դոլար գումար, իսկ մյուս ննջասենյակից՝ ոսկյա զարդեր։

Դեպքի վայր է մեկնել Սյունիքի մարզային քրեական վարչության օպերատիվ խումբը՝ վարչության պետ Անտոն Անտոնյանի գլխավորությամբ, ովքեր ձեռնարկվում են օպերատիվ հետախուզական միջոցառումներ դեպքի հանգամանքները պարզելու, գողի կամ գողերի ինքնությունը ճշտելու նրանց և գողոնը հայտնաբերելու ուղղությամբ։

Դեպքի փաստով քրեական ոստիկանությունում փաստաթղթեր են կազմվել, որոնք փոխանցվել են ՀՀ քննչական կոմիտեի Սյունիքի մարզային քննչական վարչություն։