Դատարանը մերժել է ԲՀԿ-ի հայցերը. Հրապարակ
«Բարգավաճ Հայաստան» կուսակցությունը 2 հայտ էր ներկայացրել Վարչական դատարան՝ ԿԸՀ-ի 254 և 255 Ա որոշումների դեմ, որոնցով երկու ընտրատեղամասերում անվավեր էին ճանաչվել քվեարկության արդյունքները։ 10/51 և 35/65 ընտրատեղամասերում քվեարկության արդյունքների անվավեր ճանաչման հետևանքով «Բարգավաճ Հայաստանը» կորցրել էր ավելի քան 200 ձայն, ինչը ազդում էր ընտրություններում անցողիկ շեմը հաղթահարելու վրա:
Կուսակցությունը հայտարարել էր, որ անվավեր են ճանաչվել հատկապես այն տեղամասերի արդյունքները, որտեղ «Բարգավաճ Հայաստանը» ստացել է մեծ թվով քվեներ։
«Հրապարակ»-ը տեղեկացավ, որ երկու հայցն էլ դատավորներ Արթուր Ավագյանը և Անի Չիլինգարյանը մերժել են։
Փաստաբան Արամ Օրբելյանը մեզ հետ զրույցում հայտնեց, որ դատավոր Արթուր Ավագյանը թեև մերժել է հայցը, բայց արձանագրել է խախտում և վերաքվեարկություն նշանակելու անհրաժեշտություն․ «Դատարանի որոշման մեջ մասնավորապես ասվում է՝ Ինչ վերաբերում է Օրենսգրքի 95-րդ հոդվածի 1-ին մասով սահմանված կենտրոնական ընտրական հանձնաժողովին վերապահված՝ առանձին ընտրական տեղամասերում վերաքվեարկություն նշանակելու լիազորությանը, ապա դատարանն արձանագրում է, որ այն սահմանված է Ազգային ժողովի ընտրությունների արդյունքներն ամփոփելու վարույթում կենտրոնական ընտրական հանձնաժողովին վերապահված լիազորությունների շրջանակներում, որով Կենտրոնական ընտրական հանձնաժողովն իրավասու է առանձին ընտրական տեղամասերում նշանակելու վերաքվեարկություն, ուստի տվյալ նորմով սահմանված լիազորությունը սույն դեպքում թեև կիրառելի չէ, սակայն Կենտրոնական ընտրական հանձնաժողովն Ազգային ժողովի ընտրությունների արդյունքների ամփոփման փուլում ստիպված է լինելու իր որոշմամբ (սույն գործով վիճարկվող) արձանագրված խախտումների լույսի ներքո ընդունել որոշում առանձին ընտրական տեղամասում վերաքվեարկություն անցկացնելու մասին»:
Հետևեք մեզ Viber-ում
