Ապրում ենք մի իրականության մեջ, որտեղ մարդու կյանքը դարձել է վարչական որոշումների պատանդ․ պատգամավոր

ՀՀ ԱԺ պատգամավոր Թագուհի Թովմասյանը ֆեյսբուքյան իր էջում գրում է․

«Արդարադատությունը բարձրագույն արժեք է, ոչ թե իշխանական կամայականության գործիք։
Այսօր՝ Մարդու իրավունքների պաշտպանության միջազգային օրը, հերթական անգամ պետք է արձանագրենք, որ Հայաստանում մարդու իրավունքները չեն կարող լինել ընտրովի արդարադատության ու վարչական որոշումների զոհ։
Տարիներ շարունակ հետևողական եմ մարդկանց հիմնարար իրավունքների պաշտպանությանը և շարունակելու եմ…
Ունենք շատ ծանր փաստեր․
Տիգրան Գալստյան – «Սրբազան պայքարի» գործով կալանավորված գործարարը 2025թ. հունիսի 26-ից «Արմավիր» ՔԿՀ-ում կալանքի տակ է: Ազատազրկման վայրում՝ 4 ամիս անց, լուրջ առողջական խնդիրների պատճառով գործարարը հայտնվեց անվասլյակին և, ըստ ԱՆ-ից ինձ ուղարկված պատասխանի, մինչ օրս «Իզմիրլյան» ԲԿ-ում է: Իր ոտքով կալանավայր գնացած քաղաքացին այսօր անվասայլակին նստած է՝ առանց առողջությանն արժանապատիվ վերաբերմունքի երաշխիքների։ Այս հարցով դիմել եմ Արդարադատության նախարար Սրբուհի Գալյանին, ով պատասխանել է, թե դա իրենց իրավասությունից դուրս է, և հարցը փոխանցել է Առողջապահության նախարարության տիրույթ: Սակայն Անահիտ Ավանեսյանը դեռ չի պարզաբանել, մինչ օրս որևէ հստակ բացատրություն չկա՝ ինչու է գործարարը հայտնվել անվասայլակի վրա։Միքայել արքեպիսկոպոս Աջապահյան – Շիրակի թեմի առաջնորդը, կալանավորվելով հունիսի 28-ին, մինչ օրս զրկված է ազատությունից։ Նա ցանկանում է վիրահատվել իր վստահելի բժշկի մոտ՝ «Իզմիրլյան» ԲԿ-ում, սակայն ստացել է այլ բուժհաստատություն «առաջարկվող» տարբերակ, իսկ նոյեմբերի 28-ի գրությամբ պարզապես արձանագրվել է, թե նա «հրաժարվել է» անվճար բուժօգնությունից՝ շրջանցելով նրա ընտրության իրավունքը։
Մենք ապրում ենք մի իրականության մեջ, որտեղ մարդու առողջությունն ու կյանքը դարձել են վարչական որոշումների պատանդ, և այս երկու դեպքը, ցավոք, բացառիկ չեն։
Երբ ազատությունը ճնշվում է, իսկ հիվանդի իրավունքը՝ խնամքի և արժանապատիվ վերաբերմունքի, ստորադրվում է, դա ոչ միայն իրավական, այլև խորապես բարոյական հանցագործություն է» ,- գրել է նա։