Նոր մանրամասներ`Թեղուտի ողբերգական դեպքից

Փետրվարի 21-ին ողբերգական դեպք է տեղի ունեցել Լոռու մարզում: Ժամը 14:00-ի սահմաններում, Արտակարգ իրավիճակների նախարարության փրկարար ծառահության Լոռու մարզային փրկարարական վարչության ճգնաժամային կառավարման կենտրոն ահազանգ է ստացվել, որ Թեղուտ գյուղի վարչական տարածքում գտնվող պղինձմոլիբդենային հանքավայրի` 9 մետր խորությամբ հորանի մեջ քաղաքացի է ընկել և անհրաժեշտ է փրկարարների օգնությունը: Ինչպես դեպքի վայրից հայտնում է ֆոտոլրագրող Գագիկ Շամշյանը, ժամանել են մարզի փրկարարական վարչության աշխատակիցները` վարչության պետ Հրաչիկ Անտոնյանի և Ալավերդու թիվ 40 հրշեջ փրկարարական ջոկատը` ջոկատի հրամանատար Արմեն Բարսեղյանի գլխավորությամբ: Օպերատիվորեն նշված գործարան են ժամանել նաև ոստիկանության Թումանյանի բաժնի օպերատիվ խումբը` բաժնի պետ Արամ Ղազարյանի և բաժնի պետի տեղակալ Նարեկ Սիրադեղյանի գլխավորությամբ: Առաջին իսկ պահից նշված վայրում են եղել նաև 1-03 շտապօգնության բժիշկները: Մոտ 5 ժամ է տևել, մինչև հրշեջ փրկարարները և նրանց օգնության ձեռք մեկնած «Հատուկ լեռնափրկարար ծառայություն» ՓԲԸ-ի աշխատակիցներն ու գործարանի պատասխանատուները հատուկ ճոպանների միջոցով կարողացել են հորից դուրս բերել Ալավերդի քաղաքի Սանահին-Սարահարթ թաղամասի բնակիչ` 57-ամյա Հայկ Սարգսյանի դին: Դեպքի վայրում հավաքվածները ֆոտոլրագրողին ասում էին, որ մահացածը ամուսնացած էր, խնամքին ուներ 2 աղջիկ և 1 տղա, և ինքն այդ հանքավայրում ինչ որ ծառայության պետ էր: Հորանի մոտ աշխատանքներ կատարելու ժամանակ` ըստ նախնական տեղեկությունների, չի պահպանվել անվտանգության մի քանի կանոններ: Դեպքի վայր են ժամանել նաև Հայաստանի քննչական կոմիտեի Լոռու մարզային քննչական վարչության մեծ թվով քննիչներ` մարզի քննչական վարչության պետ Թաթուլ Շուշանյանի գլխավորությամբ: Տեղում քննչական աշխատանքները ղեկավարել է ավագ քննիչ Կարեն Մոսինյանը, ում կողմից փաստի առթիվ նյութեր են նախապատրաստվում: Նշանակվել են մի շարք փորձաքննություներ, այդ թվում` դիակի դատաբժշկական և տեխնիկական անվտանգության: