Ով է փոխարինելու Արծվիկ Մինասյանին

ՅԴ-ում չեն քննարկել հարցը, թե ով է խորհրդարանում փոխարինելու պատգամավոր Արծվիկ Մինասյանին, ով առաջիկայում նշանակվելու է էկոնոմիկայի նախարարի պաշտոնում: Այս մասին Ազգային ժողովում լրագրողների հետ զրույցում ասաց ԱԺ ՀՅԴ խմբակցության պատգամավոր Արմեն Ռուստամյանը: «Այդ հարցը մենք դեռ չենք քննարկել»,-Արմենպրես-ի հաղորդմամբ՝ նշեց Ռուստամյանը՝ պատասխանելով հարցին, թե ո՞վ է ԱԺ-ում փոխարինելու Արծվիկ Մինասյանին: Արմեն Ռուստամյանը հերքեց նաև խոսակցությունները, թե Շիրակի մարզպետի պաշտոնի թեկնածուի հարցում ՀՅԴ-ում տարաձայնություններ կան: «Նման բան չկա, ամեն ինչ արդեն հստակեցված է: Եկող շաբաթ կիմանաք»,- ասաց ՀՅԴ խմբակցության ղեկավարը: Պատգամավորը նկատեց, որ իրենք իրատես են, գիտակցում են, որ շատ խնդիրներ կան լուծելու: «Մենք պետք է կարողանանք հնարավորինս համախմբել բոլոր ռեսուրսները, որպեսզի հնարավոր լինի առկա խնդիրներին արագ լուծում տալ»,- հավելեց Ռուստամյանը: Նա հավելեց, որ ՀՀԿ-ի հետ կա գաղափարական, քաղաքական նույնություն, որի հիմքի վրա հնարավորություն կար համագործակցություն ձևավորել: «Դրա համար եմ ասում, որ սա չպետք է դիտարկել որպես կոալիցիոն համաձայնություն պաշտոնների և պորտֆելների համար: Սա հեռանկարային համագործակցություն է: Մենք շատ երկար ենք բանակցել, որպեսզի կարողանանք հիմնական տարաձայնությունները հարթել, որպեսզի հետագայում նման խնդիրներ չունենանք»,- եզրափակեց ՀՅԴ-ական պատգամավորը: - See more at: http://www.lragir.am/index/arm/0/country/view/128040#sthash.D4YBaZD3.dpuf