Ծառուկյանին պատգամավորական անձեռնմխելիությունից զրկելը Արարատ Միրզոյանի սրտով չէ. նա ընդդիմանում է

Երեկ իրավապահները վաղ առավոտից գտնվում էին ԲՀԿ առաջնորդ, պատգամավոր Գագիկ Ծառուկյանի Առինջի առանձնատանը և խուզարկություն իրականացնում, որից հետո պարոն Ծառուկյանն այցելել է ԱԱԾ` տեղում հարցաքննվելու:  

Այդ ընթացքում նրա կուսակից պատգամավորները կարծիք հայտնեցին, որ քաղաքական որոշում է կայացվել, Գագիկ Ծառուկյանին զրկել մանդատից և ձերբակալել:

«Քաղաքական որոշում է կայացվել, որ երեքշաբթի գլխավոր դատախազը մտնի ԱԺ՝ Գագիկ Ծառուկյանին պատգամավորական անձեռնմխելիությունից զրկելու և որպես մեղադրյալ ներգրավելու միջնորդությամբ»,-այդ մասին ֆեյսբուքյան իր էջում գրել է Ազգային ժողովի «Բարգավաճ Հայաստան» խմբակցության պատգամավոր Նաիրա Զոհրաբյանը՝ ընդգծելով, որ ՀՀ գլխավոր դատախազ Արթուր Դավթյանը դեռ շանս ունի չկատարելու քաղաքական պատվեր։

Մենք արդեն գրել ենք, որ երեկ բավականին լուրջ քննարկում է տեղի ունեցել Կառավարությունում, որի ընթացքում վարչապետ Նիկոլ Փաշինյանը հրահանգել է Գագիկ Ծառուկյանին զրկել պատգամավորական անձեռնմխելիությունից, սակայն գլխավոր դատախազ Արթուր Դավթյանն ընդդիմացել է` պնդելով, որ բավարար հիմքեր չկան` Գագիկ Ծառուկյանին մանդատից զրկելու և ձերբակալելու համար:

Համաձայն «Ազգային ժողովի կանոնակարգ» սահմանադրական օրենքի 108-րդ հոդվածի 1-ին մասի՝ տեղեկացնում եմ, ՀՀ գլխավոր դատախազի կողմից ստացել եմ ՀՀ Ազգային ժողովի պատգամավոր Գագիկ Կոլյայի Ծառուկյանի նկատմամբ քրեական հետապնդում հարուցելուն համաձայնություն տալու վերաբերյալ և ՀՀ Ազգային ժողովի պատգամավոր Գագիկ Կոլյայի Ծառուկյանին ազատությունից զրկելուն համաձայնություն տալու վերաբերյալ միջնորդագրեր, ֆեյսբուքյան իր էջում գրել է ԱԺ նախագահ Արարատ Միրզոյանը։

«Հարցն ընդգրկվել է հունիսի 16-ին մեկնարկող հերթական նիստերի օրակարգում», - նշել է Միրզոյանը։

Մեզ հայտնի է դարձել նաև, որ Գագիկ Ծառուկյանին պատգամավորական անձեռնմխելիությունից զրկելու միտքը ԱԺ նախագահ Արարատ Միրզոյանի սրտով չէ, նա նույնիսկ քննարկման ժամանակ ընդդիմացել է, և ասել, որ վարչապետը ետ կանգնի այդ մտքից: