Արտասահմանյան բրենդներ են կեղծել.Ծխախոտի պատմության նոր մանրամասներ

Վատիկանում Հայաստանի նախկին դեսպան Միքայել Մինասյանը շաբաթներ առաջ պայթացրեց Փաշինյանի հովանավորչությամբ մաքսանենգ ճանապարհով ծխախոտի բիզնես ծրագիր, հայտնեց նաեւ, որ ինչ-ինչ նկատառումներից ելնելով փակագծեր չի բացում: Մեզ հայտնի է դարձել, որ խոսքը ոչ թե տեղական ծխախոտի մասին է, քանի որ եթե լիներ տեղական ծխախոտ, ապա ԵԱՏՄ-ի տարածքում ըստ էության ակցիզավորման կարիք չկար, այլ միջազգային բրենդերի կեղծված տարբերակների: Պարզվում է՝ մի շարք միջազգային բրենդերի կեղծված խմբաքանակ է արտահանվել, որը մի քանի անգամ ծանրացնում է տեղի ունեցած հանցանքը:

Հիշեցնենք, որ Հայաստանի երրորդ նախագահ Սերժ Սարգսյանի փեսա Միքայել Մինասյանը  Փաշինյանների ընտանիքին մի շարք կոռուպցիոն մեղադրանքներ է վերագրում: Սերժ Սարգսյանի փեսան մայիսի 12-ին և 18-ին հայտարարել էր, որ Նիկոլ Փաշինյանը, կինը՝ Աննա Հակոբյանը, կնոջ եղբայրը՝ Հրաչյա Հակոբյանը և Նիկոլ Փաշինյանի եղբորորդին՝ Սիփան Փաշինյանը, ներգրավված են մաքսանենգ ճանապարհով Հայաստանից Ռուսաստան արտահանված ծխախոտային սկանդալի մեջ: Հիշեցնենք՝ մինչ Մինասյանի հայտարարությունը, ապրիլի 29-ին տեղեկություն տարածվեց, որ ՌԴ հատուկ ծառայություններն ապրիլի 25-ին Կրասնոդարի օդանավակայանում մաքսանենգ ծխախոտի խմբաքանակ են կալանավորել, իսկ մյուս խմբաքանակը, ըստ Մինասյանի, մայիսի 9-ին առգրավվել է Վորոնեժում: Միքայել Մինասյանը պնդում է նաև, որ այս գործընթացում ներգրավված է ՊԵԿ նախագահի տեղակալ Շուշանիկ Ներսիսյանը, որը ղեկավարում է Մաքսային ծառայությունը և մտերիմ է Աննա Հակոբյանի հետ: