Իշխանափոխությունը ՕՐՕ-ի օրակարգում է

«Այժմ ունենք ոչ լեգիտիմ խորհրդարան: Մենք մեր գործունեությունը ցանկացած պարագայում շարունակելու ենք: Ներկայումս ունենք ոչ լեգիտիմ խորհրդարան, ոչ լեգիտիմ ձևավորված իշխանություն, որը չի կարողանալու ո՛չ մեր պետական շահը պաշտպանել, ո՛չ Արցախի հարցում առաջընթաց ապահովել, ոչ էլ տնտեսական դաշտում բարեփոխումներ իրականացնել»,-լրագրողներին ասաց «Օհանյան-Րաֆֆի-Օսկանյան» նախընտրական դաշինքի շտաբի ղեկավար, «Ժառանգություն» կուսակցության փոխնախագահ Արմեն Մարտիրոսյանը  : Հիմնական քաղաքական պրոցեսները դուրս են մնացել խորհրդարանից,ասաց նա: Նրա խոսքով, հիմա «մենք վերակազմավորման նոր փուլ ենք սկսել, եւ դաշինքում ընդգրկված ուժերի միջեւ համագործակցությունը կշարունակվի:Ցանկացած պարագայում, անկախ ամեն ինչից, մենք մեր գործունեությունը շարունակելու ենք, իշխանափոխությունը մնալու է մեր օրակարգում»: Հիմնական քաղաքական գործընթացները դուրս մնացին խորհրդարանից, քանի որ ընտրությունը ոչ թե քաղաքական գործընթաց էր, այլ սև քարոզչության արդյունք, ձայների առքուվաճառք, ուղղորդված քվեարկություն,ասաց նա: Փողոցային պայքարին անդրադառնալով՝ Արմեն Մարտիրոսյանն ասաց, որ դրա համար պետք են որոշակի շարժառիթներ: Շատ են շարժառիթները, երբ ժողովուրդը տեսնի՝ ինչ վիճակ է ու դուրս գա փողոց, մենք առաջին շարքում ենք լինելու: ՕՐՕ տեղեկատվական կենտրոնի համակարգող Հովսեփ Խուրշուդյանի խոսքով էլ՝ ակնհայտ է, որ ընդդիմությունը պարտվեց, քանի որ չկարողացավ համոզել ընտրողին, որ միասնական հակաիշխանական այլընտրանք ունի։ «ՕՐՕ դաշինքը ամեն ինչ արեց, որպեսզի լայն համախմբում հնարավոր լինի իշխանության դեմ, այդ այլընտրանքը ձևավորվի, և մարդիկ տեսնեն, որ իրենց քվեն կարող է իրական փոփոխությունների բերել»,–ասաց Հ. Խուրշուդյանը։ Սոնա Դավթյան