Որ ուժերն են ամենից շատ լուսաբանվել

Երեւանի մամուլի ակումբը այսօր հրապարակեց հեռարձակվող ԶԼՄ-ներում ԱԺ ընտրությունների լուսաբանման մշտադիտարկման միջանկյալ հաշվետվությունը` փետրվարի 15-մարտ 4։ ԵՄԱ նախագահ Բորիս Նավասարդյանը նշեց, որ  հիմնականում հավասարակշռված լուսաբանում է եղել: Նա նախ ասաց, որ միջազգային դիտորդները իրենց գոհունակությունն են հայտնել ընտրությունների արդյունքների վերաբերյալ։ «Թե՛ միջազգային, թե՛ տեղական դիտորդներն արձանագրել են, որ այս ընտրությունների անցկացման հետ կապված մի քիչ պակաս են դժգոհությունները, քան նախորդ ընտրությունների ընթացքում, ես կարող եմ ասել, որ հեռարձակվող լրատվամիջոցների առումով մենք գրեթե նույն իրավիճակն ունեինք, ինչ 2012 և 2013 թվականների համապետական ընտրությունների ժամանակ»,- տեղեկացրեց նա: Բորիս Նավասարդյանը ընդգծեց ՀՀ առաջին նախագահ Լևոն Տեր-Պետրոսյանի եւ Գագիկ Ծառուկյանի հեռուստատեսային հարցազրույցները՝ նշելով, որ մեր բնակչության մոտ 80 տոկոսը շարունակում է հեռուստատեսությունը դիտարկել որպես հիմնական տեղեկատվության աղբյուր: «Լևոն Տեր-Պետրոսյանը  թե նախագահության ընթացքում, թե քաղաքականությունից հեռանալուց հետո, թե ընդդիմություն լինելու ընթացքում հիմնականում շփվել է արտասահմանյան լրատվամիջոցների հետ, որևէ անգամ տաղավար չի գնացել, հարցազրույցներ տվել է տանը: Նույնն էլ Գագիկ Ծառուկյանին է վերաբերվում: Դա պատմական իրադարձություն է: Նշանակում է, որ հեռուստատեսությունը շարունակում է մեծ նշանակություն ունենալ»,-ասաց նա: Բորիս Նավասարդյանի խոսքով ամենից շատ լուսաբանվել են ՀՀԿ-ն, Ծառուկյան դաշինքը, Կոնգրես-ՀԺԿ դաշինքը, Ելք դաշինքը, ՀՅԴ-ն։