Ինձ մեղադրում, ասում են՝ «դու վարչապետ էիր, ինչ արեցիր». որ թվարկեմ, Կարեն Կարապետյանի ուշքը կգնա. Արամ Սարգսյան

Այսօր «Ելք» դաշինքի անդամները քարոզարշավ են իրականացնում Մեծ Մանթաշում: Դաշինքի անդամ, «Հանրապետություն» կուսակցության նախագահ Արամ Սարգսյանը ողջունեց Մեծ Մանթաշի բնակիչներին:«Այս ցուրտը սկսեց դուր գալ և տաքացրեց այն պահից, երբ այս հերոսական գյուղի բնակիչներից մեկը մոտեցավ ու ասաց՝ «եղբայրդ՝ Վազգենը, մեզ բոլորիս անուն առ անուն ճանաչում էր»: Ափսոս, ես բոլորիդ անուն առ անուն չեմ ճանաչում, բայց սրտով եմ զգում, հավատացեք»,- ասաց Ա. Սարգսյանը: Այնուհետև ասաց, որ իրեն բազմաթիվ անգամներ մեղադրում ու ասում են՝ «ա՛յ, դու վարչապետ էիր, ինչ արեցիր»։ «Ժողովուրդ ջան, ես չեմ սիրում էդ թեմայով խոսել, բայց ես որ թվարկեմ, էս Կարեն Կարապետյանի ուշքը կգնա։ Շատ պարզ ուզում եմ ձեզ ասել՝ իմ վարչապետության շրջանում՝ հոկտեմբերի 27-ից հետո, էն ձեւի իրավիճակ էր, որ բոլորը բոլորին կասկածում էին։ Ինձ խնդրել են, որ ես գամ, ես չեմ ուզել։ Հավատացեք՝ որեւէ մեկին չեմ ցանկանում էն, որ եղբոր մահից հետո գնա նստի եղբոր աթոռին, զգա էդ հոտը։ Բայց ես գնացել եմ դրան։ Դրանից հետո ես ազգային համաձայնության կառավարություն եմ ստեղծել։ Թող որեւէ վարչապետ չասի, որ ինքը քաղաքական էդպիսի քայլ է արել։ Նույնիսկ Սերժ Սարգսյանը խոստացավ, չկարողացավ, երազի էլ, չի կարողանալու: Կարեն Կարապետյանը երբ «Գազպրոմ-Արմենիա»-ում էր աշխատում, այնքան լավ կառավարեց, որ դրա 20 տոկոսը պարտքի դիմաց տվեցինք ռուսներին, հետո էլ ասաց, որ դա լավ գործարք է»: