«Գիտեք, թիվ 1 ընտրատարածքը ընդլայնվել է, և ես առաջարկում եմ ձեզ միանալ մեր մեծ ընտանիքին և իրար վստահելով, միասին գնալ դեպի առաջընթաց». Ռոբերտ Սարգսյան

Հանրապետական կուսակցության կողմից թիվ 1ընտրատարածքում ռեյտինգային ընտրակարգով առաջադրված պատգամավորի թեկնածու Ռոբերտ Սարգսյանը շարունակում է բակային հանդիպումները ընտրողների հետ: Այս անգամ նա հանդիպել է Նոր նորք վարչական շրջանի նոր թաղամասերի բնակիչների հետ: «Ավանցիներն ու ՆորՆորքի 1-ին, 2-րդ զանգվածների բնակիչներն ինձ լավ ճանաչում են, նրանցից շատերն անգամ ինձ հետ հանդիպել են ընդունելության օրերին՝ կա՛մ կուսակցության գրասենյակում, կա՛մ Ավան վարչական շրջանի աշխատակազմի շենքում, և գիտեն, որ ես միշտ հասանելի եմ նրանց համար: Այս օրերին միակ խոստումը,որ կարող եմ տալ. շարունակելու եմ նույն աշխատաոճը և լինելու եմ միշտ ձեր կողքին: Եվ քանի որ թիվ 1 ընտրատարածքը, գիտեք, ընդլայնվել է, ընտրվելու դեպքում ընդունելության առանձին օրեր եմ սահմանելու նաև Նոր Նորքի ու Քանաքեռ-Զեյթունի բնակիչների համար»,- նշել է Ռոբերտ Սարգսյանն ու հավելել, որ հենց այս եղանակով է հնարավոր քաղաքացուց իմանալ՝ ինչպե՛ս է աշխատում պատգամավորը ընտրվելուց հետո: Նոր Նորք վարչական շրջանում պատգամավորի թեկնածուի հետ միասին հանդիպումներին ներկա էին նաև ՀՀ ԱԺ պատգամավորներ Գագիկ Մելիքյանն ու Վահրամ Մկրտչյանը: «Ինչպես և ես,Ռոբերտ Սարգսյանն էլ պետաիրավական հանձնաժողովի անդամ է: Մի հանձնաժողովի, որի աշխատանքն առերևույթ քիչ տեսանելի է, բայց ծավալուն է ու պատասխանատու: Լավ իմանալով Ռոբերտ Սարգսյանի մարդկային որակներն ու աշխատասիրությունը՝ վստահ եմ, շարունակելու է աշխատել նույն ոգով ու ազնվությամբ»,-նշել է Վահրամ Մկրտչյանը: Դիմելով թիվ մեկ ընտրատարածում առաջին անգամ ընդգրկված թաղամասերի բնակչներին՝ Ռոբերտ Սարգսյանն ասել է. «Պատգամավորությունը ինձ համար երբևիցե ինքնանպատակ չի եղել: Պատգամավոր լինելն ինձ համար ճանապարհ է՝ ծառայելու մեր ժողովրդին: Նախորդ տարիներին դրանում համոզվելու հնարավորություն ունեցել են թե ավանցիները, և թե Նոր Նորքի 1-ին և 2-րդ զանգվածների բնակիչները: Միգուցե ինձ մեղադրում են, որ ես քչախոս եմ, միգուցե ելույթներ ամբիոնից չեմ ունեցել Ազգային ժողովում, բայց ես միշտ եղել եմ մեր բնակիչների կողքին ու իմ լիազորությունների շրջանակում պատրաստակամ եմ նորից շարունակելու ու աջակցելու ձեզ, ձեր կողմից բարձրացված խնդիրների լուծմանը: Գիտեք, թիվ 1 ընտրատարածքը ընդլայնվել է, և ես առաջարկում եմ ձեզ միանալ մեր մեծ ընտանիքին և իրար վստահելով, միասին գնալ դեպի առաջընթաց:»