Վանդալիզմ Երևանում
Այսօր՝ մարտի 20-ին, Երևան քաղաքի ՀԱԹ-ի «Սուրբ Երրորդություն» եկեղեցու մոտակա՝ «Երիտասարդություն» զբոսայգում առավոտյան զբոսանք կատարող քաղաքացիները նկատել են, որ այնտեղ տեղադրված հայ մեծանուն բանաստեղծ Հովհաննես Շիրազի արձանը պղծված է: Ինչպես հայտնում է ֆոտոլրագրող Գագիկ Շամշյանը, արձանի որոշ հատվածներ ներկված են բրոնզով: SHAMSHYAN.com-ի թղթակցի հետ զրույցում բանաստեղծուհի Աիդա Ավդալյանը եղածը «վանդալիզմ» որակեց և ասաց, թե չի ուզում հավատալ, որ այս ամենի հետևում հայ է կանգնած: Ըստ նրա՝ արձանն այսպես պղծողները թուրքից էլ վատն են և նրանք այս կերպ խորը վիրավորանք են հասցրել Հայ մարդուն: Քաղաքացիներից մի քանիսն էլ այս ամենը որակեցին «սրբապղծություն», քանզի, ըստ նրանց, միայն սրբություն չհարգող մարդն էր ընդունակ նման կերպ վարվել մեծն Շիրազի արձանի հետ: Ինչևէ, համոզված լինելով, որ այս ամենը կառաջացնի հայերի մեծամասնության դժգոհությունը, բոլորի անունից խնդրում ենք համապատասխան կառույցների ղեկավարներին գտնել, ինչպես քաղաքացիները նշեցին, սրբապիղծներին և պատասխանատվության ենթարկել:
Հետևեք մեզ Viber-ում
