Վերացվել է Արթուր Սարգսյանի տեսակցությունների արգելանքը

Հատուկ քննչական ծառայությունը վերացրել է «Սասնա ծռեր» զինված խմբի անդամներին հաց հասցրած Արթուր Սարգսյանի նկատմամբ տեսակցությունների արգելանքը: Այս մասին մեզ հետ զրույցում հայտնեց Արթուր Սարգսյանի փաստաբան Դավիթ Գյուրջյանը: Վերջինիս խոսքով՝ ՀՔԾ-ն արգելանքը վերացրել է իրենց միջնորդության հիմա վրա, սկզբում հետաձգել է լուծումը, սակայն վերանայել է տեսակցությունների հարցը և բավարարել: «Բավարարումը, սակայն մասամբ է եղել, կոնկրետ իմ պաշտպանյալներից Արթուր Սարգսյանի մասով միայն: ՀՔԾ-ն ոչ մի հիմնավորում չի տվել, թե սկզբում ինչու է հետաձգում և կրկին ոչ մի հիմավորում՝ ինչու հենց իրենը, իսկ մյուսիներինը՝ ոչ, որևէ հիմնավորում չկա: Դրա դեմ էլ բողոք ենք ներկայացրել դատախազություն՝ մոտեցումը պարզելու և հասկանալու համար, թե ինչու է սահմանափակված մնում մյուսներինը»,- ասաց պաշտպանը: Փաստաբանը տեղյակ չէր՝ «Հաց բերող»-ի հարազատները տեսակցել են նրան, թե ոչ, սակայն կարծում է, որ պետք է տեսակցած լինեն: Խոսելով Արթուր Սարգսյանի մասին, Դավիթ Գյուրջյանը նաև նշեց, որ Արթուրի առողջական վիճակը շարունակում է գտնվել վատ վիճակում. «Հիմա նաև վիրահատության կարիք կա, մենք համապատասխան միջնորդությունը կներկայացնենք քրեակատարողական հիմնարկին, որպեսզի տեղափոխեն և բուժզննություն իրականացնեն»: