«Բարև Երևանը» վարչապետին է հղում երկրորդ առաջարկը
Երևանի ավագանու «Բարև Երևան» խմբակցության ղեկավար Գագիկ Բաղդասարյանի մամլո հաղորդագրությունը Հարգելի պարոն վարչապետ, Ս.թ. նոյեմբերի 15-ին Երևանի ավագանու «Բարև Երևան» խմբակցության կողմից Ձեզ ուղղված բաց նամակում առաջարկել էինք ծառայողական ավտոմեքենաների մեծ մասը հետ վերադարձնել պետությանը և նշել էինք պատճառները՝ հասկանալով, թե դա ինչ մեծ բեռ է պետական բյուջեի համար: Չստանալով ոչ մի պատասխան, այնուամենայնիվ, Ձեզ ենք հղում մեր երկրորդ առաջարկը, որի միջոցով հնարավոր կլինի բյուջեն համալրել հսկայական գումարներով, այն է՝ վերանայել գույքահարկերի գնահատման գործընթացը, քանի որ ՀՀ-ում գոյություն ունեցող հազարավոր առանձնատների և անշարժ գույքերի գնահատումը չի համապատասխանում իրականությանը: Ըստ էության, համաձայն պաշտոնական տվյալների, Երևան քաղաքում գոյություն ունեն մեկ տասնյակից ոչ ավելի առանձնատներ, որոնց գինը գերազանցում է կես միլիոն դոլարը, սակայն փաստ է, որ ոչ միայն Երևանում, այլ նաև ամբողջ երկրում գոյություն ունեն հազարավոր շքեղ առանձնատներ և գույք, որոնց արժեքը անզեն աչքով նայելիս էլ ակնհայտ է՝ միլիոններ է կազմում: Կարծում ենք, որ անհրաժեշտ է իրականացնել գույքի վերագնահատում և իրական արժեքից իրական գույքահարկի գանձում պետական բյուջե: Վստահ ենք, որ այս քայլով ՀՀ բյուջեն կհամալրվի ահռելի միջոցներով: Անհասկանալի է Ձեզ ուղղված հաղորդագրություններին, նամակներին չպատասխանելը և խմբակցության հետ հանդիպման առաջարկը ձգձգելը. չէ՞ որ Երևանի ավագանին երևանցիների կողմից ընտրված մարմին է, և մենք նույնպես ցանկանում ենք ունենալ արժանապատիվ կյանքով ապրող հայրենակիցներ և զարգացած պետություն: Հարգանքներով՝ Գագիկ Բաղդասարյան «Բարև Երևան» խմբակցություն
Հետևեք մեզ Viber-ում
