«Կարծում եմ՝ կարիք չկա չէ դա հիշեցնելու...» Լ. Ալթունյան

Այսօր Ազգային ժողովի արտահերթ նիստում բյուջեի նախագծի քննարկման ժամանակ ՀՀ առողջապահության նախարար Լևոն Ալթունյանը նշեց, որ 2017 թվականի պետական բյուջեի նախագծով առողջապահության բնագավառին հատկացվում է 85 միլիարդ 772 միլիոն  դրամ։ Ինչպես ասաց՝  անգամ ամենազարգացած երկրներում առողջապահության  ոլորտում ներդրվող միջոցները երբեք շատ չեն լինում։ «Կարծում եմ՝ կարիք չկա չէ դա հիշեցնելու... Բյուջետային միջոցների 78 տոկոսը նախատեսված է արտահիվանդանոցային և  հիվանդանոցային ծառայությունների համար։ Արտահիվանդանոցային ծառայությունների համար նախանշվող 14 ծրագրերի համար  նախատեսվում է հատկացնել 27.4 միլիարդ դրամ, հիվանդանոցային ծառայությունների համար նախատեսվող 17 ծրագրերի համար՝ ավելի քան 39 միլիարդ դրամ։ Անցած տարված համեմատ շեղումը կազմում է 639 միլիոն դրամ կամ 1.6 տոկոս՝ պայմանավորված պահպանման ծախսերի կրճատմամբ և որոշ ծառայությունների ծավալների վերանայմամբ»,- նշեց Լ. Ալթունյանը։ Ինչպես փաստեց՝ 2017 թվականին կշարունակվեն սոցիալապես անապահով և հատուկ խմբերում ընդգրկված  զինծառայողների, ինչպես նաև փրկարար ծառայողների և նրանց ընտանիքի անդամների աջակցությանն ուղղված ծրագրերը, սոցիալական փաթեթի շահառուներին մատուցվող բժշկական օգնության ծառայությունները: Այնուհետև տեղեկացրեց, որ սրտի  վիրահատությունների իրականացման ծրագրի համար նախատեսվել է 3 միլիարդ դրամ։ Ինչպես նաև 2017 թվականին կշարունակվեն ՀՀ նախագահ Սերժ Սարգսյանի նախընտրական ծրագրի դրույթներից բխող՝ մարզային առողջապահական համակարգի արդիականացումը և զարգացումը։ Սոնա Դավթյան