«Թող Վանաձորը հրաժարական տա, բայց ոչ Ասլանյանը». Նաիրա Զոհրաբյան
«Այս պահին կարևոր չէ, թե ո՞ր կուսակցության՝ ԲՀԿ-ի, ՕԵԿ, թե՞ «Լուսավոր Հայաստանի» անդամներն են քվեարկել Մամիկոն Ասլանյանի օգտին: Հիմա դիմում եմ իրեն՝ էդքան «տղամարդկություն» եք ունեցել թաքուն, գողեգող, գնացել քվեարկել եք, ուրեմն՝ ունեցեք տղամարդկություն կանգնելու ու ասելու՝ դուք եք եղել, լավ եք արել, ինչ եք արել, Ձեր գործն է, որից հետո նոր ավագանին կսկսի աշխատել»: ԱԺ-ոււմ անդրադառնալով Վանաձորում տեղի ունեցած հետընտրական զարգացումներին նշեց ԱԺ ԲՀԿ խմբակցության ղեկավար Նաիրա Զոհրաբյանը, հավելելով, որ անկախ ամեն ինչից Վանաձորի ավագանին պետք է աշխատի: «Ինձ ասում են՝ մտավախություն չունե՞ք, որ ԲՀԿ-ից կարող են լինել, ոչ, չունեմ, դա արդեն կլինի ԲՀԿ խնդիրը»,- շարունակեց նա: Զոհրաբյանն անդրադառնալով «Հայկական վերածնունդ» կուսակցության նախագահ Արթուր Բաղդասարյանի՝ Վանաձորում հարցում անել և վիճակի մասին նրանից կարծիք հարցնելու առաջարկին, շեշտեց, թե ցանկացած ելք քննարկելի է: Միևնույն ժամանակ նա ասաց թե առաջարկվածը ոչ թե ելք է, այլ պատասխանատվության լղոզում է: «Մինչև այդ 4-ի բացահայտումը, կոալիցիա կազմելը նշանակում է, որ մենք այդպես էլ չենք իմանա՝ ովքեր էին այդ 4-ը, և կուսակցություններից յուրաքանչյուրի վրա խորհրդարանական ընտրություններից առաջ կմնա այդ խարանը: Դրա համար եմ ասում՝ էդքան տղամարդ եք եղել, եթե դուք տղամարդ եք իրականում, գնացել, թաքուն քվեարկել եք, ուրեմն՝ տղամարդկություն ունեցեք և ասեք, որ դուք եք եղել»,- շարունակեց պատգամավորը: Նաիրա Զոհրաբյանն ընդգծեց՝ Վանաձորի ՀՀԿ-ական քաղաքապետ Մամիկոն Ասլանյանը պետք է հրաժարական տա. «Ինձ համար արտառոց է, որ երբ քաղաքապետին հարցնում են, թե որքա՞ն պետք է շարունակվի այս իրավիճակը, նա ասում է՝ ինչքան դիմանա Վանաձորը: Այսինքն՝ թող Վանաձորը հրաժարական տա, ինքը չի տա»: Փայլակ Ֆահրադյան
Հետևեք մեզ Viber-ում
