Նաղդալյանը «թողել» է, որ մտնեն իր գրպանը

Զոհված զինծառայողների կամ հաշմանդամ զինծառայողների ընտանիքներին քաղաքացիների աշխատավարձերից 1000 դրամ պարտադիր կարգով փոխանցելու մասին օրինագծի շուրջ քննարկումները խորհրդարանում շարունակվում են: Ելույթով հանդես եկավ ԱԺ փոխնախագահ Հերմինե Նաղդալյանը: «Խոսեցին նախընտրական դիվիդենտների մասին, Աստված սիրեք, նախընտրական դիվիդենտի համար կարելի էր շատ ավելի արդյունավետ գաղափարներ գտնել»,- հայտարարեց Նաղդալյանը: Վերջինս հորդորեց այս հարցը չքաղաքականացնել: «Ամպագոռգոռ խոսքեր ասացին՝ «առանց իմ թույլտվության՝ իմ գրպանը մտնել», ի սեր Աստծո, երեք օր է՝ օրենքի նախագիծ ենք քննարկում, ո՞րն է այստեղ առանց իմ թույլտվությանը, բա էս ի՞նչ ենք անում էստեղ։ Խնդրում եմ՝ այս օրինագծի ու հիմնադրամի հետ կապված ձեռնպահ մնալ նման մոտեցումներից, գոնե մեկ անգամ վեր կանգնեք ձեր քաղաքական դիրքորոշումներից, քննադատական մոլուցքով տոգորված ելույթներից, մի անգամ այս ամբիոնը մի օգտագործեք քաղաքական նպատակներով, հազար անգամ այդ ելույթները ունեցել եք, էլի եք ունենալու, գոնե այս հարցը չօգտագործեիք սեփական քաղաքական նպատակների համար։ Հասկանում եմ՝ նախընտրական շրջան է, բայց գոնե մեկ անգամ փորձեք իջնել ձեր ամենաանսխալի պատվանդանից, ձեր ամենաազնիվի ու խելոքի դիրքից, մյուսներին սևացնելու ձեր մոլուցքից ետ կանգնեիք»,- ոգեշունչ ելույթ ունենալիս հայտարարեց միլիոնատեր ԱԺ փոխնախագահը: Այս քննարկման ընթացքում Հ. Նաղդալյանը համոզվել է, որ անկախ նրանից, թե ինչ են այսօր ասում, բոլորը կողմ են այս օրինագծին: «Եթե անգամ կողմ էլ չքվեարկեք, հարգարժան գործընկերներ, դուք չեք կարող կողմ չլինել, որովհետև հարցը հայ զինվորին է վերաբերում, իսկ մենք այս երկու օրը նրան մոռացանք, քննարկեցինք աշխարհի տակ ինչ խնդիր կա՝ կոռուպցիա, հիմնադրամ, պահածո, մատակարար, ներդրումների ռիսկայնություն, դղյակ, բայց մոռացանք հայ զինվորին, սպային, սահմանում կանգնածին։ Սա քաղաքական հարց չէ և չպետք է լինի։ Այս օրինագծի շուրջ քաղաքական պայքար չի կարող լինել»,- եզրափակեց Հերմինե Նաղդալյանը: Փայլակ Ֆահրադյան