«Աթեշյանն անհրաժեշտ բացատրությունները տվել է, Գարեգին Բ-ն կհանդիպի նրան». Տեր Վահրամ
Հայկական Ժամանակ» թերթի լրագրողը զրուցել է Մայր աթոռ Սուրբ Էջմիածնի տեղեկատվական համակարգի տնօրեն Տեր Վահրամ քահանա Մելիքյանի հետ – Տեր Վահրամ, ո՞րն է Աթեշյանի Հայաստան այցի նպատակը, ի՞նչ միջոցառման է մասնակցելու: – Միջոցառման որեւէ հարց չկա, նման այցեր տեղի են ունենում հաճախակի: Հատկապես, նվիրապետական աթոռներում եւ Սփյուռքի թեմերում ծառայող եկեղեցականները հաճախ են Մայր աթոռ Սուրբ Էջմիածին այցելում: Այդպիսին պետք է դիտարկել նաեւ Արամ արքեպիսկոպոս Աթեշյանի այցը: Վստահ եմ, որ այս օրերին հանդիպում տեղի կունենա նաեւ Ամենայն հայոց կաթողիկոսի հետ: – Նրա շուրջ բարձրացած աղմուկից հետո սա Հայաստան առաջին այցն է: Ինչպես հայտնի է՝ Աթեշյանը չեկավ մասնակցելու նույնիսկ հոգեւոր խորհրդի նիստին: Դրանով է պայմանավորված նրա այցի նկատմամբ հետաքրքրությունը: – Անձը շարունակում է ծառայություն իրականացնել: Նա անհրաժեշտ բոլոր բացատրությունները տվել է իր կատարած քայլերի առնչությամբ եւ Մայր աթոռ Սուրբ Էջմիածինն էլ, բնականաբար, պիտի շարունակի իր հարաբերությունները: Այս իմաստով մարդը եկել է Սուրբ Էջմիածին իր պարտականությունները կատարելու: – Տեր Վահրամ, Աթեշյանը վերջերս նամակով դիմել էր Թուրքիայի իշխանություններին՝ խնդրելով թույլ տալ նոր պատրիարքի ընտրություն իրականացնել՝ հաշվի առնելով, որ գործող պատրիարքն արդեն 8 տարի է անգործունակ է: Նամակին արձագանք եղե՞լ է: – Ես այդ մասին դեռ տեղեկություններ չունեմ: Վստահ եմ՝ նա այս օրերին եւս որոշակի պարզաբանումներ կտա: Սակայն հայտնի է, որ գործընթացը դեռ նոր է սկսվում եւ չեմ կարծում այսքան վաղ արձագանք լինի: Ամբողջությամբ կարող եք կարդալ «Հայկական Ժամանակ» թերթի այսօրվահամարում:
Հետևեք մեզ Viber-ում
