Վիգեն Սարգսյանը՝ իրեն ծաղրողների մասին

ՀՀ Ազգային ժողովում որտեղ քննարկվում է ՀՀ պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին, զինծառայողների և նրանց ընտանիքի անդամների սոցիալական ապահովության մասին ՀՀ օրենքում լրացումներ և փոփոխություններ կատարելու մասին, պետական կենսաթոշակների մասին ՀՀ օրենքում լրացումներ կատարելու մասին ՀՀ օրենքների նախագծերի փաթեթը, ՀՀ Պաշտպանության նախարար Վիգեն Սարգսյանն անդրադարձավ սոցցանցերում իր անվան հետ կապված սրամտություններին: Օրինակ` նա նշեց, որ հազար դրամանոցի վրա իր նկարն են տեղադրել, կամ կան մարդիկ, որոնք պոտենցիալ դասալիքներ են, բայց քննադատություն են հնչեցնում: Սարգսյանը մատնանշեց նաև մամուլի հրապարակումները, որոնք, ըստ նրա, ոչ միայն անտեղի են, այլև ամոթալի: Վիգեն Սարգսյանի խոսքով` այդ հրապարակումներից մեկը վերնագրված էր. «Մահ իմացեալ, մահ վճարյալ»: «Գիտեմ, որ քննարկումներն, այս թեմայի հետ կապված, տեղափոխվել են մի դաշտ, որը քննարկման հետ կապ չունեն, բայց հասկանում եմ, որ վստահության խնդիր է: Շնորհակալ եմ նաև այն կարծիքների համար, որ ասում էին` եկեք կամաց խոսենք, սահմանին կանգնած տղաները կարող են լսել»,- ասաց Վիգեն Սարգսյանը: ԱԺ պատգամավոր Էդմոն Մարուքյանն էլ առաջարկեց Դիլիջանում գտնվող թանկարժեք ուսումնական կենտրոնը վաճառել ու գումարը ներդնել բանակի հիմնադրամում, արագաչափերից գանձվող գումարները ևս ուղղել այդ հիմնադրամ: Նախարարը պատասխանեց, որ բոլոր առաջարկներն էլ պատրաստ է քննարկել, սակայն մինչև կենտրոնը որոշվի վաճառել և մինչև վաճառվի, ժամանակ կանցնի, մինչդեռ օր առաջ պետք է սկսել հիմնադրամի գումարների հավաքագրումը: «Ենթադրված թալանվածը, անարդյունավետ ծախսերը միանշանակ պետք է վերադարձվեն բյուջե, այստեղ նոր բան հորինելու անհրաժեշտություն չկա»,- ասաց Վիգեն Սարգսյանը: Փայլակ Ֆահրադյան