Որոշում Գագիկ Խաչատրյանից «ազատվելու» մասին

ՀՀ Կառավարությունն այսօրվա նիստում որոշում կայացվեց Պետական եկամուտների կոմիտեի հաշվեկշռում գտնվող Դիլիջանի ուսումնական կենտրոնը հանձնել Կառավարությանն առընթեր պետական գույքի կառավարման վարչությանը: Ըստ որոշման՝ Դիլիջանի Պարզ լճի 24/1 և 26/1 հասցեներում գտնվող 15 մլրդ 038 մլն 533 հազար 564.0 դրամ սկզբնական և 12 մլրդ 607 մլն 294 հազար 553.6 դրամ հաշվեկշռային արժեքներով անավարտ շինարարության օբյեկտը, այդ թվում՝ հողատարածքը, դրա շահագործման հետ կապված գույքը ՊԵԿ-ից հետ վերցնել և ամրացնել Կառավարությանն առընթեր պետական գույքի կառավարման վարչությանը: Որոշումը Կառավարությանը ներկայացրեց ՊԵԿ նախագահ Վարդան Հարությունյանը: Գործադիրը հավանություն տվեց: Կառավարություն ներկայացված փաստաթուղթը հիմնավորված է հետևյալ կերպ. «Հաշվի առնելով, որ ներկայումս աննպատակահարմար է ՊԵԿ-ի կողմից կենտրոնի շահագործումը` նախագծով նախատեսվում է օբյեկտն ամրացնել ՀՀ ԿԱ Պետական գույքի կառավարման վարչությանը` հետագայում Կենտրոնն օգտագործման իրավունքով այլ անձի հանձնելու պայմանով»: Հիշեցնենք, որ Դիլիջանի ուսումնական կենտրոնը կառուցվել էր ՊԵԿ նախկին նախագահ, ֆինանսների նախկին նախարար Գագիկ Խաչատրյանի նախաձեռնությամբ: Փայլակ Ֆահրադյան