«Էքսպերիմենտ...վարչապետը նորմալ մարդ է, բայց հեչ քաղաքական գործիչ չէ». Արամ Կարապետյան

Հարցազրույց «Նոր ժամանակներ» կուսակցության նախագահ Արամ Կարապետյանի հետ.

-Պարո՛ն Կարապետյան, այս օրերին ակտիվորեն քննարկվում է գազի սակագնի նվազեցման հարցը: Վարչապետը մատնանշել է այն հիմքերը, (գազի տարանցման գնի նվազեցում, վարկային պարտավորությունների թեթևացում,  սպառման ծավալների և եկամուտների աճ, «Գազպրոմի» կողմից սակագնի նվազեցման ռիսկն իր վրա վերցնելու  պատասխանատվություն),  որոնք  թույլ են տալու սակագին նվազեցնել: Ըստ Ձեզ՝ արդյոք նախկինում հնարավոր չէր այս մեթոդով ՀՀ քաղաքացիներին  էժան գազ մատակարարել: 

-Երեք կարևոր հանգամանք կա,  որը կապված է ոչ միայն «Գազպրոմ-Արմենիայի», այլ  նաև քաղաքականության  և  ընդհանուր տնտեսական իրավիճակի հետ: Առաջին՝ ինչու «Գազպրոմ-Արմենիան» մինչ այս նման կարևոր քայլի չգնաց: Այս հարցի պատասխանները կապված են քաղաքական ֆակտորի հետ՝ առջևում ընտրություններն են, և բացի դա Կարեն Կարապետյանը եկել է  «Գազպրոմ-Արմենիայից»: Երկրորդ՝ գազի վաճառքի ծավալներն աշխարհով մեկ ընկնում են,  և «Գազպրոմ-Արմենիան» շատ մեծ վնասներ է կրում: Հայաստանն անմասն չի մնում և, բնականաբար, եթե վաճառքի  ծավալներն ընկնում են, դա օբյեկտիվ պատճառ է,  պետք է սակագինը վերանայել:

Բացի իմ նշած այս խնդիրները հիշենք, որ Հայաստանի բյուջեի վիճակը շատ վատ է,  և այն ցուցանիշները որոնք մեր պետությանը թույլ կտային նոր վարկեր ներգրավել,  այժմ չկան: Բացի այդ մենք ԵԱՏՄ-ի անդամ ենք և, ըստ այդ կառույցի կանոնադրության, յուրաքանչյուր պետություն պետք է ունենա իր բյուջետային քաղաքականության համապատասխան ցուցանիշները, եթե դրանք վատն են, ապա հարց է առաջանում այդ պետությունն ինչպես կարող է իր մյուս պարտավորությունները կատարել: Նշեմ նաև, որ  գազի գնի նվազեցման հարցը շատ ավելի բուռն սկսվեց քննարկվել այն ժամանակ,  երբ վարչապետը ետ վերադարձավ Մինսկից: Կարծում եմ՝ այնտեղ նույնպես քննարկվել է այս հարցը:

-Գազի սակագնի նվազեցմանն ուղղված քայլերը վարչապետն անվանեց էքսպերիմենտ: Դուք կիսո՞ւմ եք նրա  տեսակետը: 

-Այն,  որ այս քայլը  տնտեսական էքսպերիմենտ է,  փաստ է:  Իջեցնել գազի գին՝  չունենալով ինքնարժեքի գնագոյացման բաղադրիչներից որևէ մեկի  կայուն իջեցում,   էքսպերիմենտ է, որովհետև գազի գինը սահմանի վրա չի իջնում, տարանցիկ տեղափոխման ծախսի   իջեցում Վրաստանում՝  դեռ չգիտենք, մնում է ինքնարժեքի ձևավորման միակ աղբյուրը՝ տվյալ տնտեսական սյուբեկտի ներքին վարչարարությունը՝ աշխատավարձեր, աշխատուժ և այլն: Եվ այս դեպքում, իրոք, էքսպերիմենտ է:

Իմ կարծիքով՝  վարչապետը նորմալ մարդ է,  բայց հեչ քաղաքական գործիչ չէ, ինչ է նշանակում տնտեսության վրա կատարել էքսպերիմենտներ:

Տնտեսական առումով վարչապետի այդ միտքը հասկանալի է, քաղաքական առումով՝  ոչ:

-Իրան-Հայաստան հարաբերությունների համատեքստում որքանով եք հավանական համարում, որ Հայաստանը գազ ստանա Իրանից կամ դառանա իրանական գազի համար տարանցիկ երկիր: 

-Պարսկաստանի հետ բանակցությունները շատ բարդ են ընթանում.  նայենք «Հյուսիս-Հարավ» նախագիծը կամ երկաթգծի վերաբերյալ բանակցությունները: Կհաջողի թե ոչ, չեմ կարող ասել. մի փոքր թերահավատությամբ եմ նայում այս ամենին:

-Կառավարության  ղեկավարի հերթական հանձնարարականներից մեկն էլ ապօրինի հարստացման նախագծի քրեականացման մասին էր: Կարծում եք նման նախագծով մենք այլևս չե՞նք ունենա կոռումպացված պաշտոնյաններ: 

-Ինձ համար ընկալելի չէ այդ նախագիծը: Թալանի դեպ տարվող պայքարի համար  նոր օրենք պետք չէ ընդունել: Այն օրենքները,  որոնք գործում են մեր երկրում տալիս են հնարավորություն պայքարելու գողության դեմ: ՀՀ քրեական, քրեադատավարական օրենսգրքերը լիովին բավարար են նման պայքար տանելու  համար, տալիս են  հնարավորություն  պայքարելու ապօրինի հարստահարման, փողերի լվացման, կաշառակերության և կոռուպցիայի դեմ: Այդքան օրենք գրելու փոխարեն, թող գոնե մեկ թալանողի բռնեին: Իմ կարծիքով՝ «Սասնա ծռեր» զինված խմբի ապստամբությունից հետո իշխանությունը խելքի եկավ և փորձում է  մի նոր գիծ գծել և գործել այնպես, ինչպես օրինակ Հոլանդիայի չինովնիկները: Սա, պարզապես, խաբկանք է, որովհետև, եթե դու չես պատժում նախկինին,  նոր բան ստեղծել ուղղակի չես կարող:

Հարցազրույցն՝ Աղավնի Սուքիասյանի