«Գազպրոմը» խոստացել է իր վրա վերցնել բոլոր ռիսկերը.սակագինը կնվազի
Ազգային ժողովում լրագրողների հետ զրույցում Հանրային ծառայությունները կարգավորող հանձնաժողովի նախագահ Ռոբերտ Նազարյանը ներկայացրեց այն աղբյուրները, որոնց հաշվին հունվարի 1-ից Հայաստանում բոլոր սպառողների համար կնվազի գազի սակագինը: «Ես կարծում էի, որ գազի սակագինը անապահով խավի համար պետք է նվազեր սահմանի վրա գազի սակագնի նվազման հաշվին, սակայն աղբյուրներն այլ են, որոնց մասին խոսել է նաև ՀՀ վարչապետ Կարեն Կարապետյանը: Աղբյուրները 4-ն են: Դրանցից մեկը Ռուսաստանից Հայաստան հասնող գազի տարանցման գնի նվազումն է: Այդ տարանցման պայմանագրի ժամկետը լրանում է 2017 թ. հունվարի 1-ին: Այս պահին վրացական կողմի հետ բանակցություններ են ընթանում տարանցման սակագները նվազեցվելու ուղղությամբ: Այդ նվազեցման հաշվին խնայված բոլոր գումարները կուղղվեն խնդրի լուծմանը»,- ասաց Նազարյանը: Ֆինանսավորման երկրորդ աղբյուրն այն արտոնություններն են, որոնք տրվում են բիզնեսին և սոցիալապես անապահով խավին: «Մենք ենթադրում ենք, որ պետք է սպառման լրացուցիչ ծավալներ ունենանք, որի հասույթը նույնպես կհանդիսանա ֆինանսավորման աղբյուր: Երրորդ աղբյուրն այն է, որ «Գազպրոմ Արմենիա»-ն դիտարկում է, որ իրենք ժամանակին ունեցել են բավականին մեծ ֆինանսական պարտավորություններ, որոնց մեծ մասն արդեն վերացել է և որոշակի օպտիմիզացիայի հաշվին որոշակի ֆինանսական միջոցներ ևս կուղղվեն խնդրի լուծմանը: Չորրորդ ֆինանսավորման աղբյուրը «Գազպրոմ» ընկերությունն է: ՀԾԿՀ նախագահը նշեց, որ «Գազպրոմ» ընկերությունը խոստացել է իր վրա վերցնել բոլոր ռիսկերը, որոնք կարող են առաջանալ առաջին երեք աղբյուրների բավարար չլինելու դեպքում: Եթե այդ աղբյուրները բավարար չլինեն, «Գազպրոմ»-ը կսուբսիդավորի մնացած մասը,-ասաց Նազարյանը:
Հետևեք մեզ Viber-ում
