Վարչապետի անձով պայմանավորված փոփոխություն

«Ազատ դեմոկրատներ» կուսակցության վարչության անդամ Արմեն Առաքելյանն այսօր լրագրողների հետ հանդիպմանն ասաց, որ գազի գնի իջեցումը ողջունելի է, բայց ցավալի է, որ դա արվում է ոչ թե պետության վարած քաղաքականության արդյունքում, այլ պայմանավորված է վարչապետի անձով: «Ցավալի է, որ սա արվում է զուտ վարչապետի անձնային կապերի շնորհիվ: Նա «Գազպրոմի» մարդն է, իսկ գործընկերներն իրար աջակցելու լավ սովորություն ունեն»,-«Հայելի» մամուլի ակումբում հայտարարեց Արմեն Առաքելյանը: «Շատ ցավում եմ, որ մինչ այդ ամբողջը հանձնեցինք «Գազպրոմին», մինչդեռ առաջարկվում էր նորմալ խողովակ անցկացնել Հայաստանով: Իրանը պատրաստ էր 1400 միլիմետրանոց խողովակ անցկացնելու: Իսկ մեր իշխանությունները մի փոքր բարակ խողովակ դրեցին եւ հետո նվիրեցին «Գազպրոմին»՝ պարտքի դիմաց»,-հավելեց նա: ՀՀԿ խմբակցության անդամ Արտակ Դավթյանի խոսքերով, երբ խողովակաշարի կառուցման բանակցություններ էին ընթանում Իրանի հետ, ինքը եղել է էներգետիկայի  փոխնախարար եւ տեղյակ է, որ Իրանի հետ բանակցելը բավական բարդ գործ է: «Այդ գործում բացառիկ ներդրում են ունեցել այն ժամանակվա նախարար Արմեն Մովսիսյանը եւ Կարեն Կարապետյանը: Իրականում Իրանի դեպքում հայտարարությունը գործի վերածելը շատ բարդ գործ է:  Ընդ որում՝ 700 միլիմետրանոց խողովակաշարը հնարավորություն է տալիս տարեկան 2,5 մլրդ խմ գազ տեղափոխել, մինչդեռ, Հայաստանը սպառում է շուրջ 1,3 մլրդ խմ: Ներկայիս խողովակաշարը եւս հնարավորություն է տալիս գազ արտահանել: Կարծում եմ, տեղյակ եք, որ Հայաստանն արդեն գազ է տալիս Վրաստանին, ստանում է Էլեկտրաէներգիա, որն էլ փոխանցվում է Իրան»,-ասաց պատգամավորը: Արտակ Դավթյանը ժպտալով հակադարձեց. «Այդ դեպքում փառք ու պատիվ մեր վարչապետին, որ կարողանում է իր անձնական կապերն օգտագործել մեր բնակչության համար»: Արտակ Դավթյանը համաձայն չէ գնահատականների հետ, թե սակագների իջեցումը նախընտրական խայծ է. «Ինչ էլ անենք՝ նախընտրական շրջանի հետ կկապեն»: