Խոշոր ու ողբերգական ավտովթար Գառնի գյուղում. կա 1 զոհ. ՖՈՏՈՌԵՊՈՐՏԱԺ

Նոյեմբերի 3-ին, ողբերգական ավտովթար է տեղի ունեցել Կոտայքի մարզում: Ժամը 20:30-ի սահմաններում Գառնի գյուղի Գեղարդի խճուղում բախվել են Գառնի գյուղի բնակիչներ, 61-ամյա Եփրեմ Եփրեմյանի վարած ВАЗ 2107 մակնիշի 43 ԼՕ 930 համարանիշի և 32-ամյա Արգամ Վարդանյանի վարած ГАЗ 66 մակնիշի 30 ԼՍ 382 համարանիշի ավտոմեքենաները: Ինչպես դեպքի վայրից հայտնում է ֆոտոլրագրող Գագիկ Շամշյանը, բախման հետևանքով 07-ը կողաշրջվել է և մինչ այդ բախվել գազատար խողովակներին: Դեպքի վայր են ժամանել ճանապարհային ոստիկանության 2-րդ սպայական գումարտակի 3-րդ վաշտի 1-ին դասակի աշխատակիցները՝ վաշտի հրամանատար Արթուր Պետրոսյանի, հրամանատարի տեղակալ Երվանդ Ալեքսանյանի, դասակի հրամանատար Հրանտ Գալստյանի գլխավորությամբ: Դեպքի վայրում հավաքվածները ասում էին, որ կողաշրջված մեքենայի միջից վարորդին դուրս են բերել քաղաքացիները և նրան հիվանդանոց են ուղեկցել Ա. Պետրոսյանն ու Ե.Ալեքսանյանը: Հիվանդանոցից ֆոտոլրագրողին հայտնել են, որ ճանապարհին վիրավորը մահացել է: Դեպքի վայր է ժամանել ճանապարհային ոստիկանության Գառնիի բաժնի օպերատիվ խումբը՝ բաժնի պետ Գևորգ Համբարձումյանի գլխավորությամբ: Վթարի մասին ՃՈ օպերատիվ կառավարման կենտրոնի պատասխանատու հերթապահ Միքայել Աղաբեկյանը տեղեկությունը փոխանցել է Հայաստանի քննչական կոմիտեի Կոտայքի մարզային քննչական վարչություն, որտեղից վարչության պետ Մհեր Վարդանյանի կարգադրությամբ դեպքի վայր է ժամանել քննիչ Արման Գրիգորյանը, ում կողմից փաստի առթիվ նյութեր են նախապատրաստվում: Քննիչի հանձնարարականով մեքենաները տեղափոխվում են ոստիկանության Գառնիի բաժանմունքի պահպանվող հատուկ տարածք: Ֆոտոլրագրողը հայտում է նաև, որ գյուղամիջյան այդ ճանապարհը ամբողջովին մերկասառույց էր: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: Լուսանկարները` Գագիկ Շամշյանի