Վարչապետը ոստիկանապետին ժամանակ տվեց
ՀՀ վարչապետ Կարեն Կարապետյանն այսօր հանձնարարել է ոստիկանապետ Վլադիմիր Գասպարյանին՝ բանակցել «Սեքյուրիթի Դրիմ» ընկերության հետ և մեկ շաբաթյա ժամկետում ներկայացնի իրավական լուծումներ, որպեսզի սեփականության ձևով պայմանավորված վերոնշյալ ընկերության գործառույթները՝ այդ թվում ֆինանսական ամբողջ տնօրինումը և կառավարումը, անցնեն պետական կառույցներին: «ՀՀ ԿԱ ոստիկանության պետին հանձնարարում եմ՝ ըստ անհրաժեշտության, ներգրավվելով ՀՀ ֆինանսների և ՀՀ արդարադատության նախարարությունների ներկայացուցիչներին, բանակցել «Սեքյուրիթի դրիմ» ՍՊԻ-ի հետ և մեկշաբաթյա ժամկետում ներկայացնել իրավական լուծումներ, որպեսզի սեփականության ձևով պայմանավորված վերոնշյալ ընկերության գործառույթները, այդ թվում՝ ֆինանսական հոսքերի ամբողջական տնօրինումն ու կառավարումն անցնեն պետական կառույցներին», - ասաց վարչապետը։ «Հանձնարարում եմ ոստիկանապետին մինչև նոյեմբերի 30-ը ներկայացնել ճանապարհային ոստիկանության համակարգի բարեփոխումների հայեցակարգ՝ սահմանելով հստակ ժամկետներ և չափելի էական արդյունքներ»,- հանձնարարեց Կարեն Կարապետյանը: Վարչապետը միաժամանակ հանձնարարականներ տվեց նաեւ ֆինանսների և արդարադատության նախարարներին՝ աջակցել Երևանի քաղաքապետարանին «Փարքինգ Սիթի սերվիս» և «Լոկատոր» ընկերությունների հետ բանակցություններում և մեկշաբաթյա ժամկետում ներկայացնել իրավական լուծումները, որպեսզի սեփականության ձևով պայմանավորված նրանց գործառույթները՝ այդ թվում ֆինանսական հոսքերի ամբողջական տնօրինումն ու կառավարումը, անցնեն համայնքային կառույցներին:
Հետևեք մեզ Viber-ում
