Մշակվում է փոփոխությունների ճանապարհային քարտեզ

Այսօր Հայելի ակումբում լրագրողների հետ զրույցում Հիմնադիր խորհրդարանի անդամ Ալեք Ենիգոմշյանը հայտնեց, որ Հիմնադիր խորհրդարանն ու Սասնա ծռերի համակիրները մշակել են ճանապարհային քարտեզ:Ինչպես ասաց՝ իրենք իրենց առջեւ դրել են ոչ միայն իշխանափոխության խնդիր, այլեւ՝ իսկական հայկական պետություն ստեղծելու խնդիր։ Այդ իսկ պատճառով էլ «Սասնա ծռեր»-ի ճանապարհային քարտեզը կոչվում է «Նոր հանրապետության հիմնադրում»։ «Ծրագիրը այժմ դրված է քննարկման, բոլոր քաղաքացիները կարող են իրենց առաջարկներն անել: Այդ բոլորը քննարկելուց հետո հաշվի կառնվեն բոլոր առաջարկները: Առաջարկները կարող են ուղարկվել Սասնա ծռեր խմբավորում ֆեյսբուքյան էջին: Հայաստանում ունենք իշխանափոխության խնդիր, քանի որ այսօրվա իշխանությունը դեմ է գնում պետությանը: Պարզապես իշխանափոխությամբ մենք մեր բոլոր խնդիրները չենք լուծի։ Այդ խնդիրները երկու բնույթի են՝ մեկը երկրի համակարգային խնդիրներն են, մյուսը՝ ինքնիշխանության խնդիրն է, սրանք շատ սերտորեն փոխկապակցված են մեկը մյուսին։ Այդ խնդիրները չէին լինի, եթե մենք լինեինք ինքնիշխան երկիր։ Արցախյան խնդիրը ավելի քան քսան տարի առաջ գետնի վրա լուծվել է, սակայն այն փաստը, որ, չենք խորշի ասելու, դավաճանական մոտեցումների պատճառով Արցախը ճանաչվեց ինքնուրույն պետություն, դե յուրե չմիացվեց Հայաստանին, Հայաստանը եւ Արցախը կախված է պահում սպառնալիքներից»,- նշեց նա: Բանախոսի խոսքով՝ Սասնա ծռեր շարժումը իր հետևից տարավ ժողովրդական լուրջ զանգվածների, սակայն չհանգեցրեց իշխանափոխության: