ՊԵԿ նորանշանակ նախագահի կարողությունը

Հայկական ժամանակը գրել է.ՀՀ կառավարությանն առընթեր պետական եկամուտների կոմիտեի նորանշանակ նախագահ Վարդան Հարությունյանը Բարձրաստիճան պաշտոնատար անձանց էթիկայի հանձնաժողով է ներկայացրել  իր եկամուտների ու ունեցվածքի հայտարարագրերը։ Հիշեցնենք, որ Վարդան Հարությունյանը մինչ ՊԵԿ նախագահ նշանակվելը ղեկավարում էր «Գազպրոմ Արմենիա» ընկերությունը։

Պարզվում՝ Վարդան Հարությունյանն ունի երկու առանձնատուն, երեք բնակարան և 12 հողամաս։ Որպես շարժական գույք նա հայտարարագրել է 1 Range Rover 4.4 L V8, 1 Mercedes-Benz S 500, 1 UAZ 469 տեսակի ավտոմեքենա։ Պաշտոնը ստանձնելու օրվա դրությամբ նա մի ընկերությունում (անունը նշված չի հայտարարագրում) 309 միլիոն դրամ արժողության բաժնետոմս ունի, իսկ ավելի քան 3 միլիոն ԱՄՆ դոլար փոխառություն է տվել։

Բացի այս ամենը, Վարդան Հարությունյանն ունի 8 միլիոն դրամը գերազանցող երկու ժամացույց և մեկ նկար։ ՊԵկ նախագահ նշանակվելու օրվա դրությամբ նա ունեցել է ավելի քան 45 միլիոն դրամ, 110 եվրո և 54 հազար ԱՄՆ դոլար։

Վարդան Հարությունյանը «Գազպրոմ Արմենիան» ղեկավարելով, միայն ընթացիկ տարում վաստակել է 123 միլիոն դրամ, իսկ տարվա փոխառությունների (որը կարող է լինել  ավանդի տեսքով) դիմաց ստացել է 121 հազար ԱՄՆ դոլար եկամուտ։