ՊՈԱԿ-ների «մաքրազարդումից» հետո Կարեն Կարապետյանը կզբաղվի մարզպետներով

Հրապարակը գրում է.Սուրիկ Խաչատրյանի պաշտոնանկությամբ սկսված մարզպետների փոփոխությունը, թվում էր, շարունակություն է ունենալու, սակայն առայժմ գործընթացին «ստոպ» է տրված։ Վարչապետը ձեռնամուխ է եղել ԾԻԳ-երի ու ՊՈԱԿ-ների կրճատմանը: Իսկ այդ կառույցներում տեղավորված են պաշտոնյանների բարեկամ, հարազատ, ընկերները, որոնք ոչնչով չեն զբաղվում, բայց բարձր աշխատավարձ են ստանում: Դրանցից որոշ մասի պահպանության ծախսերն ավելի մեծ են, քան իրականացրած ծրագրերի վրա ծախսվող միջոցները։ Այժմ հանձնարարված է ստուգել բոլոր ՊՈԱԿ-ների ադյունավետությունը, եթե դրանց աշխատանքից պետությանը որեւէ օգուտ չկա, լուծարել եւ պարտականությունները փոխանցել այլ կառույցի: Այս «մաքրազարդումից» հետո մատների վրա հաշված ՊՈԱԿ-ներ կմնան: Դրանից հետո նոր Կարեն Կարապետյանը կզբաղվի մարզպետներով: Մեզ հասած տեղեկություններով՝ Լոռու մարզպետ Արթուր Նալբանդյանին մտադիր են տեղափոխել Երեւան: Իսկ նրա փոխարեն նշանակվողի հարցում դեռ որոշակիություն չկա։ Մի տարբերակով քննարկվում է ՀՀ ոստիկանապետի տեղակալ, Լոռու նախկին ոստիկանապետ Անուբախ Համբարյանի թեկնածությունը, որը տարիներ շարունակ այս մարզում ընտրությունների իրականացնողներից մեկն է եղել՝ իշխանության կողմից։ Ինքն էլ լոռեցի է եւ մեծ սիրով կգնար հարազատ մարզ, նաեւ տեղավորվում է նախկին ոստիկանապետների՝ մարզպետներ նշանակելու կոնցեպցիայի շրջանակներում, բայց հարցը դեռ վերջնական որոշված չէ։