«Նարկաման են, գողանում են». Ջհանգիրյանը՝ ներկա պաշտոնատար անձանց զավակների մասին

Այսօր ԱԺ-ում քննարկվում է Զբաղվածության մասին օրենքում փոփոխություններ կատարելու մասին օրինագիծը, որով առաջարկվում է դատապարտյալներին ազատության մեջ հայտնվելուց հետո ՔԿ-ում կրթական ծրագիր անցնել:  Ըստ Գագիկ Ջհանգիրյանի՝ նախագծի բովանդակության հետ կապված խնդիր չկա, սակայն նա  տեսակետ հայտնեց, որ պատիժ կրելն իր մեջ ունի նաև դաստիարակվելու, հասարակություն վերադառնալու ենթատեքստ, բայց որպեսզի մարդը դաստիարակվի, արած արարքի համար պատասխանատվություն կրի, պետք է այդ արարքը կատարած լինի: «Արդար դատապարտված պետք է լինի մարդը, որ ուղղվի: Եթե անմեղ է կամ այդ հանցանքը չի կատարել կամ դատապարտվել է ուրիշ հանցանքի համար, էդ մարդու ի՞նչը ուղղենք, ի՞նչը դաստիարակենք, ինքը թշնամությամբ է լցվելու բոլորի նկատմամբ»,- նշեց Ջհանգիրյանը: Նախկին զինվորական դատախազը նաև հորդորեց ամբիոնից չհայտարարել, որ հիմնականում հանցագործություններ են կատարում մարդիկ, ովքեր աղքատ են ու սոցիալական պատճառներն են իրենց ստիպում ընկնել կալանավայրերը:«Դա այդպես չէ: Նրանք լավ էլ նյութապես ապահոված են:  Աղքատը բեռ ա կրում, բեռ ա թափում, մի քանի հազար դրամ աշխատում, որ իր երեխաներին սոված չպահի: Հանցագործություն կատարողը չունևոր մարդը չէ, նարկամանն ա, որ ուզում ա նարկոտիկ գնի, հայրը փողը չի տալիս, լավ էլ հարուստ տղու տղա է։ Հարյուրավոր օրինակներ կարող եմ ասել ներկա պաշտոնատար անձանց զավակների մասին»,- իր ելույթում ասաց Գագիկ Ջհանգիրյանը: