«Ժամանակի հարց է ԼՂ միջազգային ճանաչումը». Շարմազանով

Հայաստանի համար կարևոր հարցերից են մնում արտաքին քաղաքական և անվտանգության հարցերը, մասնավորապես՝ Լեռնային Ղարաբաղի հակամարտության շուրջ վերջին զարգացումները: ԱԺ-ում հայտարարությունների ժամին այս մասին ասաց ԱԺ փոխնախագահ Էդուարդ Շարմազանովը: Վիեննայում և Սանկտ Պետերբուրգում տեղի ունեցած հանդիպումներից հետո Ադրբեջանը, ըստ Էդուարդ Շարմազանովի, փորձեց խույս տալ ձեռք բերված պայմանավորվածություններից և Մինսկի խմբի համանախագահների տարածաշրջանային այցից առաջ դիվերսիոն փորձ կատարեց, բայց ձախողվեց: «Ադրբեջանի նման դիրքորոշումը դատապարտելի է, ցույց է տալիս, որ այդ երկրի իշխանությունները պատրաստ չեն Ղարաբաղի հակամարտության խաղաղ կարգավորմանը, որ ԼՂ ՊԲ-ն ամբողջությամբ իրականացրեց իր վրա դրված պարտականությունները՝ հետ շպրտելով հակառակորդին: Հայկական կողմը դեմ է հակամարտության ռազմական լուծմանը: Մենք խնդրի լուծման բացառապես խաղաղ կարգավորման կողմնակիցն ենք՝ Արցախի ժողովրդի ինքնորոշման ամբողջական իրացման ճանապարհով: Բայց արի ու տես, որ այս ամենով հանդերձ Ադրբեջանի ղեկավարը նշում է, որ ԼՂ-ին կարող է շնորհվել ինքնավար հանրապետության կարգավիճակ: Ադրբեջանը չէ, որ կարգավիճակ պետք է շնորհի ԼՂ ժողովրդին: Լեռնային Ղարաբաղի ժողովուրդն ինքն իրեն հանրաքվեով արդեն շնորհել է կարգավիճակ: Եվ ժամանակի հարց է ԼՂ միջազգային ճանաչումը»,- շեշտեց Շարմազանովը: