Կարճ ժամանակում հայտնաբերեցին Թաիրովից մեկից խոշոր չափի ոսկյա զարդեր գողացողին. ՖՈՏՈՌԵՊՈՐՏԱԺ, ՏԵՍԱՆՅՈՒԹ

Երեկ՝ հոկտեմբերի 21-ին, ոստիկանության Վաղարշապատի բաժնի քրեական հետախուզության բաժանմունքի և նույն բաժնի համայնքային ոստիկանության ծառայողները ստացված օպերատիվ տվյալներն իրացնելով՝ ոստիկանության Վաղարշապատի բաժին են բերման ենթարկել Գեղարքունիքի մարզի Վարդենիկ գյուղի բնակիչ, սակայն վարձակալական հիմունքներով Երևան քաղաքի Մուրացան փողոցի 109 շենքի բնակիչ, 28-ամյա Արայիկ Սարգսյանին։ Ինչպես հայտնում է ֆոտոլրագրող Գագիկ Շամշյանը, Ա. Սարգսյանը կասկածվում է հոկտեմբերի 16-ին Արմավիրի մարզի Թաիրով գյուղի Սարի Թաղ փողոցի 1-ին նրբանցքի բնակիչ, 67-ամյա Համլետ Մնացականյանի տանից խոշոր չափի գողություն կատարելու մեջ։ Ֆոտոլրագրողի տեղեկություններով՝ այդ օրը, ժամը 14։00-ի սահմաններում, Ա. Սարգսյանը, իմանալով, որ նշված տանը մարդ չկա, պատշգամբից մուտք է գործել բնակարան և այնտեղից հափշտակել 2 ոսկյա շղթա, 1 ոսկյա թևնոց և 1 ոսկյա մատանի։ Ա. Սարգսյանը ոստիկանությունում հայտնել է, որ գողացված ոսկեղենը ինքը Երևանում՝ «Վերնիսաժ» տոնավաճառում վաճառել է 700 ԱՄՆ դոլարով։ Փաստի առթիվ Հայաստանի քննչական կոմիտեի Արմավիրի մարզային քննչական վարչության Վաղարշապատի քննչական բաժնում հարուցվել է քրեական գործ։ Ա. Սարգսյանը՝ որպես կասկածյալ, ձերբակալվել է։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: