«Դուք կունենա՞ք այդքան վճռականություն` կտրելու այն ճյուղը, որի վրա նստած է իշխանությունը». Նաիրա Զոհրաբյանը՝ վարչապետին

Այսօր վարչապետ Կարեն Կարապետյանը խորհրդարանական ամբիոնից ներկայացրեց կառավարության ծրագիրը, որից հետո պատգամավորները հերթագրվեցին և ելույթներ են ունենում ծրագրի վերաբերյալ: ԲՀԿ խմբակցության ղեկավար Նաիրա Զոհրաբյանը ելույթում հիշեցրեց, որ նախորդ բոլոր կառավարությունների ղեկավարներն էլ խոսել են կախարդական փայտիկի բացակայության մասին, սակայն բոլորովին պարտադիր չէ ունենալ կախարդական փայտիկ՝ առկա վիճակը շտկելու համար: «Բազմաթիվ անգամներ ասվել է, թե ինչ պետք է անել, որ թույլ չտրվի բյուջեագողություն: Ես չեմ կարծում, որ պետք է կախարդական փայտիկ լինի, որ հայտնաբերվի, թե ովքեր են Հայաստանում մոնոպոլիստները, մի մասն այսօր այստեղ է նստած, մի մասը այստեղից դուրս է»,- ասաց Զոհրաբյանը՝ մատնացույց անելով դահլիճում ներկա պատգամավորներից ոմանց: «Բարդ է դրանց դեմ պայքարելը, բարդ, որովհետև դրանք այն մարդիկ են, ովքեր նպաստում են իշխանության վերարտադրությանը: Հիմա Դուք կունենա՞ք այդքան վճռականություն` կտրելու այն ճյուղը, որի վրա նստած է իշխանությունը: Եթե կունենաք, ինչպես ասում են՝ no comment: Բայց ես առանձնապես լավատես չեմ, որովհետև ես իրատես մարդ եմ: Չգիտեմ, կկարողանա՞ք կպնել մոնոպոլիստներին, ովքեր հոկտեմբերի 2-ին գռանդիոզ ընտրակեղծիքներով ապահովել են իշխանության վերարտադրությունը: Ես չգիտեմ՝ ինչ կլինի Ձեր անվտանգության հետ, բայց եթե պատրաստ եք գնալ դրան և կտրել այն ճյուղը, որի վրա նստած է իշխանությունը, մենք պատրաստ ենք լինել Ձեր դաշնակիցը»,- ասաց պատգամավորը: