Ալիևը չէ, որ պետք է ԼՂ ժողովրդի կարգավիճակը որոշի.Շարմազանով

««Россия сегодня» միջազգային լրատվական գործակալության ղեկավար Դմիտրի Կիսելյովի հետ հարցազրույցում Ադրբեջանի նախագահ Իլհամ Ալիևը շփոթել է «անկախ» և «ինքնավար» բառերը։Ալիևը չէ, որ պետք է ԼՂ ժողովրդի կարգավիճակը որոշի։ Եթե Ալիևը տեղյակ չէ բանակցային սկզբունքներից, ապա տեղեկացնեմ, որ դրանցից մեկը ինքնորոշման իրավունքի իրացումն է։ Այդ մասին նաև իրենց հայտարարություններում ասել են Մինսկի խմբի համանախագահ երկրները։ Նախիջևանի ինքնավար հանրապետության գոյությունը լավագույն վկայությունն է, որ մեր ժողովուրդը չի կարող ապրել Ադրբեջանի կազմում՝ ինքնավար հանրապետության կարգավիճակով։ Ադրբեջանը Նախիջանում անգամ խաչքարերի հանդեպ հանդուրժող չէ, ժողովրդի նկատմամբ ինչպե՞ս կարող է հանդուրժող լինել»,-ԱԺ-ում լրագրողների հետ զրույցմ վստահեցրեց ՀՀ ԱԺ փոխնախագահ Էդուարդ Շարմազանովը: «Արցախի միջազգային ճանաչումը ժամանակի հարց է։Արցախի խնդրում մեզ համար ամենակարևոր խնդիրը կարգավիճակի հարցն է և մեր պատասխանը Ալևին հետևյալն է՝ Արցախը որևիցե կարգավիճակով չի լինելու Ադրբեջանի կազմում։  Պրոբլեմն ադրբեջանցիների մեջ է։ Եթե փոխզիջում ասելով, նկատի ունեն ինքնավար  հանրապետություն, ապա տվայտանքների և ինքնախաբեության մեջ են։ Փոխզիջումը ԼՂ հանրապետության միջազգային ճանաչումն է, թե ինչի դիմաց՝ Ղարաբաղի իշխանությունն ու ժողովուրդը կորոշի», - ասաց նա։ Հիշեցնենք,որ Ալիևը, հայտարարել էր,թե  ԼՂ հակամարտության կարգավորման հարցում փոխզիջումը հնարավոր է. Լեռնային Ղարաբաղը կարող է լինել ինքնավար հանրապետություն, սակայն ոչ անկախ հանրապետություն: