Իրականացնում են ընտանիքի հոր՝ Կառլեն Եսայանի պատգամը/տեսաշար/

Արցախի Հանրապետության նախագահ Բակո Սահակյանը հոկտեմբերի 15-ին այցելել է Մարտակերտի շրջան: Շրջկենտրոն Մարտակերտում Բակո Սահակյանը ներկա է գտնվել նոր հյուրանոցի բացման հանդիսավոր արարողությանը: «Մանթաշ» անունով հյուրանոցը հիմնվել է Եսայանների գերդաստանի հովանավորությամբ: Մեծ շեն գյուղում երկրի ղեկավարը մասնակցել է նորակառույց մշակույթի տան, բարերար Կառլեն Եսայանի հուշարձանի և Սուրբ Գևորգ եկեղեցուն կից երիցատան բացման հանդիսավոր արարողություններին: Ծրագրերը կյանքի են կոչվել բարեգործական միջոցներով՝ Եսայան ընտանիքի հովանավորությամբ:   Բակո Սահակյանը շրջել է նորակառույց շենքում, ծանոթացել ստեղծված պայմաններին և երախտագիտություն հայտնել երևանաբնակ Եսայանների ընտանիքին՝ Սառա Եսայանի գլխավորությամբ, Մարտակերտ քաղաքում և Մեծ շեն գյուղում այս նախագծերի իրականացման և Արցախին մշտական աջակցություն ցուցաբերելու համար՝ բարձր գնահատելով նրանց մշտական աջակցությունն Արցախին: Բարեգործների խոսքով՝ իրենք իրականացնում են ընտանիքի հոր՝ Կառլեն Եսայանի պատգամը, ով ծնունդով Մեծ Շենից էր: Ընտանիքը կանգուն է պահում հայրական տունը, բանուկ՝ գյուղի ճամփան: Ասում են՝ բժիշկ ու բարերար Կառլեն Եսայանի համար արմատների արժեքը մեծ էր կյանքում: Հայաստանի Հանրապետության վաստակավոր բժշկի հիշատակն այսուհետ հավերժացնելու է ծննդավայրում տեղադրված կիսանդրին: Նրա նախաձեռնությամբ Մեծ Շենում կառուցվել է հուշահամալիր, եկեղեցի, դպրոց, մանկապարտեզ, խաղահրապարակ, համայնքապետարան և ոչ միայն: Նրա մահից հետո էլ ծրագրերը չեն դադարել: Առաքելությունը Եսայան ընտանիքը շարունակում է: «Ամուսնանալուց հետո կապվել եմ այս մարդկանց, այս հողին ու ջրին: Ես բոլորի հետ մտերիմ եմ և ամեն ինչին նայում եմ այն աչքերով, ինչ կնայեր իմ ամուսինը: Ինչ որ ամուսինս կուզեր՝ արված լիներ, ամեն ինչ պետք է արվի: Դա գիտեն նաև երեխաներս»,- նշել է բարերար Սառա Եսայանը՝ Կառլեն Եսայանի կինը: Շենքում ակումբից բացի տեղակայված են ժամանցի սենյակներ: Նախկին խարխուլ հավաքատեղին արդեն անցյալում է: